Shillong, Nohprah, 01: Ki Pulit ka Anti-Narcotic Task Force (ANTF) Meghalaya ha ka Lah Sngi u Blei kiba la ïoh jingtip na ka tnat syntiat ha ka por kumba 2.30 baje noh phai sngi ki la pynlong ïa ka jingkhynra ha Seven Sisters Hotel, Police Bazar, Shillong.
Ha ka jingkhynra, ki Pulit ki la ïoh kurup lai synduk thep sabon ba la thep ïa u drok heroin na ki ar tylli ki kamra jong ka Hotel. Ar tylli ki synduk thep sabon ba la thep ïa u drok la ïoh kurup na ka met jong u Sajul Ali, uba la 28 snem uba sah ha ka Kamra Nombar 25 jong ka Seven Sisters Hotel, katba shi synduk thep sabon ba la thep ïa u drok la ïoh kurup na u Rahim Uddin Lashar uba sah ha ka Kamra Nombar -11 ryngkat bad u Akbar Ali uba la 31 snem ka rta.
Hadien ba la leh test la pynshisha ïa u drok Heroin ba la ïoh kurup na kine ki lai ngut uba don ka jingkhia kaba 42.56 gram. Ïa u drok ba la ïoh kurup bad ïa ki lai ngut ki Pulit ki la rah noh sha Sadar Police Station ban pynlong ïa ka jingtohkit kaba bniah. Ki Pulit ki la register ïa ka case hapoh ki kyndon jong ka NDPS Act.
Ha ka jingtohkit ïa kine ki lai ngut, tang hapoh khyndiat kynta ba ki Pulit ka ANTF ki la ïohkem sa ïa uwei u nongthied drok na iew Polo uba la tip kyrteng kum u Amit Thapa, 25 snem ka rta uba sah ha Pynthor, Shillong hapdeng ka por 4:00 baje haduh 4:30 baje janmiet hadien ba ladep thied ïa u drok ar synduk thep sabon na ki lai ngut ki snar khaii drok.
U drok uba ki Pulit ki la ïoh kurup na Amit Thapa ha kane ka sngi u don ka jingkhia kaba 30.36 gram. Ïa une u nongthied drok ki Pulit ki rah noh sha thanat bad register ïa ka case hapoh ki kyndon jong ka NDPS Act.
