Shillong, Jylliew 07: Ka tnat Social Welfare ka sorkar jylla Meghalaya ha ka jingïatreilang bad ka Home (Police) bad ki bor pynïaid District jong ka East Khasi Hills District, ki la pynlong ïa ka jingïalang ïa syllok halor ka jingïakhun pyrshah ïa ka jingjyllei jong u Drok ha kaba ha kane ka jingïalang ka la don ruh ka jingthaw ïa ki Village Defence Party (VDP) ha ka jingïadonlang ruh ki MLA bad ki MDC bad ki Dorbar Shnong jong ka Greater Shillong Area kaba la pynlong hapoh State Convention Centre, Shillong.
Haba pynïaid ïa ka jingïalang u Myntri ka tnat Social Welfare u Bah Paul Lyngdoh, u la khot ïa ka jingïatreilang jong ki nongshong shnong ha ka ban ïakhun pyrshah ïa ka jingkynrei jong u drok. U la banjur halor ka jingdonkam ban pynim bad ban thaw thymmai ïa ki Village Defence Party (VDP) naba ki dei ka nongrim ba kin peit bad ban khang lad ïa ki kam beaiñ hapoh ki kam shnong.
Na ka liang u Myntri u la kyntu ïa kiba ïashim bynta ba kim dei ban ngeit ïa ki khubor ba la pynmih hapoh ki social media hynrei ba kin donkti ban wanrah ka jingkylla hapoh ka imlang sahlang. U la kyntu ruh ïa ki nongshong shnong ïa ka jingdonkam ban wanrah ïa ka sawdong sawkun kaba bha khamtam ïa ki khynnah bad ki samla pule.
Ha kane ka jingïalang la donlang u Bah Vivek Syiem, Spl. Superintendent of Police (CID), Meghalaya uba la batai halor ki kam ba la shim da ki Village Defence Party ha ka ban ïakhun pyrshah ïa u drok. Katba Dr. Bethabra Decruse, Project Director Meghalaya AIDS Control society ha ka jingpynshai ka la batai halor ka Harm Reduction Programme for People Who Inject Drugs (PWID).
Kane ka prokram ka dei ruh kum ka jingsdang jong ka prokram Drug Reduction Elimination & Action Mission (DREAM) kaba la pyllait paidbah ha u bnai Jylliew jong u snem 2023 kaba la thmu ban pynlong ïa ka jylla kaba lait na ka jingpyndonkam ïa u drok.
Ha kane ka jingïalang la donlang u Shakil P. Ahammed, Additional Chief Secretary, u Sampath Kumar, Principal Secretary, Social Welfare Department, u Bah I. W. Ingty, Secretary, Social Welfare, ka kong Idashisha Nongrang, Director General of Police, Meghalaya nalor kiwei pat.
U Myntri ka tnat Social Welfare Bah Paul Lyngdoh u la ong, “mgi la pyrshang ban ithuh ïa ki katto katne ki jaka kiba donkam ban shimkhia ha kaba ïa kane la lah ban leh da ka jingkyrshan jong kiba bun ki dorbar shnong.”
U la ong ha ka jingïalang bad ki 76 tylli ki dorbar shnong jong ka nongbah Shillong la rai ban sdang shwa ia ka jingkynrei ka jingpyndonkam ïa u drok.
“Kumta ha kane ka jingïalang kaba la sdang mynta ka sngi la ïa rai ban thaw ïa ki Village Defence Parties (VDP), kiba long kiba biang bha ban ïakhun ïa kine ki kam runar kiba la sdang ban kynrei sha ki thaiñ nongkyndong kaba la sdang ban saphriang bad ha kane ka jingïalang la rai ba kiba bun ki dorbar shnong kin sdang ban pynkhreh ba thaw ïa ki VDP,” ong u Myntri.
U la ong ba ha kaba sdang yn hap ban khmih bniah biang ïa ki kyndon kiba bun kiba la thaw ha u snem 2008, kumta ka la long kaba donkam ban pynthymmai biang ïa ki kyndon kaba long katkum ka jinglong jingman kaba mynta.
“Ngi la shim ïa ki jingai jingmut jong ki dorbar shnong bad la buh por kumba 3 taïew haduh shibnai eiei ha kaba kin sa aiti ïa kiba bun ki jingtyrwa na ka bynta ban wanrah ïa ki jingpynthymmai kiba la mynjur, bad hadien kane kiba bun ki dorbar shnong kin sdang ban thaw ïa ki VDP, ki ban ïarap ïa ki pulit bad kumjuh ruh ïa ka sorkar ha ka ban ïakhun pyrshah ïa ka jingpyndonkam bakla ïa u drok naduh ki shnong.
“Ngi la rai ruh ba ki kopi jong ki aiñ kum ka PIT NDPS yn sa sam sha kine ki dorbar shnong bad ngin sa shim ïa ki jingai jingmut jong ki khnang ban lah ban pynbha ïa kine ki aiñ bad ki kyndon,” ong u Myntri ka tnat Social Welfare.
U la ong ruh ba la shim ka rai ban jied ïa ki nongmihkhmat ba kynthup ïa ki MLA bad MDC jong baroh kawei ka jylla ha kaba kan don ka jingïasyllok ha kaba yn lah ban pyntreikam bha ïa ka DREAM project.
