Shillong, Nailur, 17: Ha ka janmiet Lah sngi u Blei ha ka por kumba 6:00 baje tam eiei, kawei ka Alto kaba don ïa u nombar ML05 X-0962 ka la thung khongpong na surok sha kawei ka phyllaw iing briew ha ka dong Lumkshaid, Mawprem, Shillong.
Ka kali Alto kaba la pra phum ka la rat lang ïa kawei ka thuk thuk kaba pynieng harud surok kat haduh ba kane ka thuk thuk ruh ka la julor.
Katto katne na ki bynta jong ka iing, ba la thung khongpong kane ka kali, ka la julor bad ki briew kiba shong basah hapoh kane ka iing ki la hap ban sei noh ïa ki tiar ki tar jong ki.
Ka iing ba kane ka kali ka thung khongpong ka dei ka iing jong ka Kong Aidistina Lyngdoh ba la shongwai da u Bah Sairos Susngi.
Ka daw ba kane ka kali ka thung khongpong ha kane ka phyllaw ing jong ki briew ka dei namarba u nongñiah u la buaid kiad jawsheh bad um treh briew shuh ha kaba um shym la lah shuh wat ban synshar ïa u lakam jong ka kali.
Ki Pulit ka Lumdiengjri Police Station kiba la ïoh jingtip ïa kane ka jingjia, ki la leit ban tan noh ïa kane ka kali bad kumjuh ruh ïa ka thuk thuk.
Ha kane ka jingjia ym shym la don mano mano ruh ba mynsaw bad wat u nongñiah ruh u la shu mynsaw malu mala.
Ïa u nongniah jong ka kali la rah noh da ki Pulit sha thanat ban pynlong ia ka jingtohkit.
