Shillong, K’lyngkot, 17: Ka Sorkar Jylla shen kan sa shim ïa ka rai ha kaba ïadei bad ka jingshna ïa ka surok Four Lane na Umïam sha Shillong.
Haba pyntip ïa kane ha ka sngi Thohdieng, u Symbud Myntri Rangbah uba khmih ïa ka tnat PWD (Roads & Buildings) Bah Prestone Tynsong u la ong ba mynta ka sngi ha ka jingïalang pyrkhat kam la tyrwa ban shna ïa ka surok na Umïam sha Shillong.
“Ngi la ïathir ïatai sani bha bad ngi la rai ba u Chief Engineer jong ka National Highway un sa shong jingïalang biang bad ki Consultant ba la thung da ka National Highways and Infrastructure Development Corporation Limited (NHIDCL) ha ki sngi ban sa wan. Kin sa shong bad kin sa shim rai kumno ban pynbeit na ka bynta ban pyndep ïa ka projek ba la tyrwa, kaba long ka projek ba kongsan (khamtam ha kaba ïadei bad ka jingshngaiñ jong ka pung Umïam, ka Dam bad ka jingkieng), u la ong.
Katkum ka jingong jong u, ka tnat Bording bad ka Meghalaya Energy Corporation Limited (MeECL) ki ladep pynjari da ka jingpyrkhing ïa ka jingïaid kali lyngba ka jingkieng Dam ha Umïam.
“Ngi la ïathir sani bha shaphang kane bad shen ngin sa lah ban rai bad tang shu dep shim rai kumno ban shna pynbeit ïa ka surok, yn sa pynkhreh noh mardor ïa ka Detailed Project Report (DPR),” la ïathuh shuh shuh u Bah Tynsong.
U Symbud Myntri Rangbah u la ong shuh shuh, “ïa kane yn sa shim rai da ki Technical Experts ryngkat bad ki Consultant bad ynda ki ladep pynkhreh, ka Sorkar kan sa ïa ka jingmynjur halor ka jingtyrwa. Ki Consultants kin sa shong pyrkhat kam biang ïa ki Technical Expert jong ka tnat PWD ha ki sngi ki ban sa wan.”
Haba kylli, la ka Sorkar ka don jingthmu neem ban shna ïa ka surok Four-lane na Jorabad-Shillong sha ka surok Six-lane, u Bah Tynsong u la ong, “haoid, kata ka jingthmu ka don. Na ka Ministry of Road Transports and Highways hynrei ïa mynta nga dang shu ïoh jingtip ba ïa ka surok Six-lane yn shna shwa na Jorabad sha Naogoan. Ka jingsorjamin ka la sdang. Ïa kane ka projek la peit hi da ka Sorkar Assam.”
Ha kaba ïadei bad ka surok Sohra-Shillong u Bah Tynsong u la ïathuh ba ka Sorkar ka la buh thong ban pynkylla ïa kane ka surok sha ka surok Two Lane.
“Haoid, ïa kata ruh la kynthup lang. Ngi sa pynkylla sha ka surok Two Lane. Ngi kwah ban pynkylla naduh Umtyngar shaduh Sohra da ka surok Two Lane. Kane kan kynthup ha ka World Bank project,” la pyntip shuh shuh u Symbud Myntri Rangbah.
