Shillong, Nailur, 21: Ka Seng Samla Mawlai Pyllun (SSMP) ha ka sngi Saitjaiñ ka la ujor da ka ejahar ha Mawlai Police Station pyrshah ïa uwei u briew uba la ai kyrteng ïalade kum u Salonsar Shylla da kaba kynthoh ïa ki kyntien saitmet kiba pynhiardor ïa ka shnong Mawlai ha ka Facebook Page kaba la tip kyrteng kum ka “Na Lympung Ki Khun Ka Ri Khasi” da kaba thoh ïa ki kyntien “RIP, Mawlai City Of Prostitution.”
Halor kane kajuh ka jingjia, ki dkhot jong ka Hynniewtrep Integrated Territorial Organisation (HITO) Mawlai Cirle ryngkat ka jingsynran lang jong ki dkhot ka HITO Shillong City ruh hynnin ka sngi Thohdieng ki la ujor da ka ejahar pyrshah ïa u Bah Salonar Shylla.
“Ngi la ujor da ka ejahar ha Mawlai Police Station halor ka jingkren tohmet jong u Salonsar Jylla ïa ngi ki nong Mawlai halor ka jingshah kem jong uwei u briew hynnin. Ka jingshah kem jong u briew kam ïa don bynta eiei bad ka shnong Mawlai. Ki kyntien kiba u Salonsar Shylla u la kynthoh ngi ki nong Mawlai bad ka Seng Samla Mawlai Pyllun (SSMP) ngim lah ban pdiang,” ong u President ka SSMP u Bah Samuel Biam.
“Ngi don ka jingsngewkhia bad ka jingbitar ïa kum kine ki riewpohdor kiba nud ban kren pyrshah ïa ka shnong Mawlai ka bym ïa don bynta eie ibad ka jingshah kem jong uwei u briew ha kine ki khyndiat sngi,” u la ong.
“Ka jingkynthoh jong u Salonsar Shylla ha ka Facebook Page ka la pynhiar dor haduh katta katta ïa ngi bad ka la pynbitar ïa ngi ki nong Mawlai haduh katta katta ïa kaba kum ki nong Mawlai baroh ngim lah ban pdiang ïa ka jingkren jong une u briew,” u la bynrap.
“Ngi dawa ba une u briew u dei ban wan panmap mardor hakhmat jong ngi ki nong Mawlai bad u dei ban wan shapoh Mawlai ban wan panmap hynrei lym kumta ka aiñ kan sa leh ïa kaba donkam namarba ngi ladep ujor ïa ka ejahar ba un ngat ha ju jingshah pynsajia kiba tyngeh. Ka jingpanmap jong u kam dei ban long tang ha ki lad pathai khubor lane ha ki Social Media hynrei u dei ban wan panmap markhmat hakhmat jong ngi ki nong Mawlai ha kano kano ka jaka hapoh ka shnong Mawlai,” la dawa une u nongïalam ka Seng Samla Mawlai Pyllun ïa u Salonsar Shylla.
“Na ka liang jong ngi, ngi kloi ban pdiang lada u wan panmap. Ka jingthwet ïa u kan nym pat kut haduh kane ka khyllipmat bad ngin ai por ïa u tang shi taiew bad lada um lah ban wan panmap bad lada jia eiei pyrshah ïa u ngin ym don ka jingbahkhlieh,” la maham u Bah Biam.
“Lada u don ka jingsngewkhia bad lada u la sngewthuh ba u la bakla u dei ban wan panmap mardor ïa ka jingthad burom jong u ïa ka shnong Mawlai. Ngi ki nong Mawlai ngi ieid ïa la ka jong ka shnong bad kam ju don kum kane ka kyntien ba isaitmet ïa ngi ki nong Mawlai la ka long ïa ki para nongshong shnong hapoh Mawlai lane ïa ki briew kiba nabar. Hynrei kumno da une u briew uba ngim lah ban tip, u sah shano, u shong shano, u dei naei, hynrei u wan kren pynban da kine ki kyntien ïa ngi ki nong Mawlai,” la bynrap u Bah Biam.
“Kum ïa kine ki jait briew ngin hap ban leh da kaba tyngeh,” u la ong.
U lyngba u President u Bah Wansuk Lawriniang bad u Secretary u Bah Balajied Jyrwa ki la kyntu ïa ki Pulit jong ka Mawlai Police Station ban shimkhia ïa kane ka jingujor da kaba pynshitom katkum ki kyndon jong ka aiñ pyrshah ïa u Bah Salonsar Shylla.
Na ka liang jong u President ka HITO Mawlai Circle u Bah Wansuk Lawriniang u la kyntu ïa ki Pulit jong ka Mawlai Police Station ban shimkhia ïa kane ka jingujor da kaba pynshitom katkum ki kyndon jong ka aiñ pyrshah ïa u Bah Salonsar Shylla.
“Ka jingkynthoh jong u Salonsar Shylla, Mawlai City of Prostitution ne ka shnong ki thei nuti. Hynrei lada ngi peit hapoh ka shnong Mawlai kiba bun ki dei ki briew kiba la nang la stad hynrei kam dei satia kumba la kynnoh da une u briew ha ka Facebook Page,” la kynthoh u Bah Lawriniang.
“Ngi maham ba kum kine ki jingkynthoh kim dei shuh ban dang jia nangne shakhmat bad lada phi don ka jingïadom ne ka jingïashrut badno badno ym ba phin shu kynnoh ïa ka shnong baroh kawei,” la bynrap u Secretary u Bah Balajied Jyrwa.
