Shillong, Naitung, 16: Ka Ïingbishar Meghalaya High Court ka la pynkylla thymmai ïa ka hukum kaba kham mynshwa da kaba ai por shuh shuh ïa ki nongdie madan ba kin phriang bad weng ïa ki dukan jong ki ha ka thaiñ Khyndai Lad.
Kane ka rai jong ka ïingbishar ka long halor ka jingmudui jong ka Meghalaya bad Greater Shillong Progressive Hawkers and Street Vendors Association.
Ka Ïingbishar ka la pynjlan ïa ka por die jingdie, da kaba ailad ïa ki nongdie madan ban die jingdie naduh ka por 12 baje mynsngi haduh ka por 2:15 baje noh sngi bad naduh ka por 7 baje janmiet haduh ka por 9:15 baje janmiet.
Hadien ba la bishar ïa ka PIL ha ka sngi Balang, ka Division Bench kaba kynthup ïa u Chief Justice IP Mukerji bad u Justice W. Diengdoh ki la ong, “hadien ba ngi la bishar ïa kine ki jingai jingmut, ngi la pynkylla ïa ka hukum jong ngi kaba la pynmih ha ka 3 tarik, Naitung, 2025 da kaba ai por shuh shuh sa shiteng kynta shiphew minit ha ka por mynsngi ba ka jingphriang ïa ki jingdie bad ka jinglum ïa ki mar bad kumjuh ruh ka jingpynjlan ïa ka por die jingdie ha ka por janmiet.”
“Yn shah ïa ki nongdie madan ban sdang ban plie naduh ka por 12:00 baje mynsngi bad ban sdang ban lum naduh ka por 2 baje noh sngi haduh ka por 2.15 baje noh sngi bad sa shisien pat ban sdang phriang ïa ki mar naduh ka por 7 baje janmiet bad ban lum mar haduh ka por 9 :15 baje mynmiet,” ka la bynrap.
Ka Ïingbishar ka la bthah ba ïa ka por die ba thymmai yn pyntreikam hapoh ka jingpeit bniah jong ki bor synshar bad u Special Officer.
Nalor kata, ka tnad pynïaid kali kan phah shuh ïa ki nongtrei ban pynbeit ïa ka jingïaid kali ha katei ka jaka ha ki por ba la pynjlan ïa ki por die madan.
“Ha kine ki kynta, ka tnad pynïaid kali kan long kaba phikir bha da kaba phah ïa ki Pulit kham bun ban pynbeit ïa ka jingïaid kali ha katei ka thaiñ,” la bthah ruh ka ïingbishar.
Ha ka jingpan jingbit, ka Meghalaya and Greater Shillong Progressive Hawkers and Street vendors Association ka la pynpaw ba ka jingpyrkhing ïa ki kynta shong die madan kim ai jingmyntoi satia katkum ka por ba la ai jingbit, kata, ban pynthiknaba katto katne ki nongdie madan ba la ïoh laisen ha Police Bazar, tad haduh ba yn sa pynkynriah da ka Sorkar sha ki jaka shong die jingdie. Ki por shong die madan kumba la pyrkhing ka long naduh 12:30 mynsngi haduh 2 baje noh sngi bad 7:30 baje janmiet haduh 9 baje mynmiet.
U P. Yobin, Advocate na ka bynta ki nongujor u la pynpaw ba katto katne ka shim por ha kaba phriang ïa ki mar bad ban lum ïa ki mar. Hapoh kane ka por ba la pyrkhing ka pynduna ïa ka kamai kajih bad ka buh jingeh ïa ki nongdie jingdie.
Ha kawei pat ka liang, u Advocate General u la pyrshang tyngeh ban pynsngewthuh ïa ka Ïingbishar ba don ki, “nongshim kabu ban ïoh jingmyntoi” kiba donkti ha lyndet jong kane ka jingpan jingbit. Ka Sorkar ka la shim ïa ki lad ki lynti baroh ban pynthikna ba ïa kine ki nongdie madan yn pynkynriah noh haduh ka 22 tarik, Naitung, 2025, u la ong.
U la pyni ruh ïa ka jingpynbna kaba la pynmih ha ka 2 tarik, Jymmang, 2025 bad ka plan bad ki dur ba la suh lang.
U la ïathuh ruh ba ïa kine ki nongdie madan ha Police Bazar la pynkynriah noh sha ki lai tylli ki jaka kata, ka MUDA Complex Frontage, ka Parking Lot MUDA ha ka mala ba nyngkong bad ka jaka ieng kali jong ka Shillong Municipal Board kaba don mar pyrshah bad ka State Bank of India (SBI) bad ba ïa kum kane ka jingpynbha yn pyndep noh hapoh ka 22 tarik, Naitung.
