Shillong, Jylliew, 02: Ka Sorkar Meghalaya bad Assam ka la aiti ha ka North Eastern Space Application Centre (NESAC) ban pynlong ïa ka jingwad bniah ha kaba ïadei bad ka jingbishar na u Stellite ïa ki jaka khlaw bapher bapher bad ban aiti ïa ka kaiphod jong ka hapoh lai bnai ha kaba ïadei bad ka jingshlei um ha ka jylla Assam.
Ïa kane ka rai la shim ha ka jingïalang kaba la long hapdeng u Myntri Rangbah ka Jylla Meghalaya u Conrad K. Sangma bad u Myntri Rangbah ka Jylla Assam u Himanta Biswa Sarma ha ka Lah Sngi u Blie ha Guwahati.
Ha kane ka jingïalang la ïakren sani ha kaba ïadei ruh bad ka jingïapynbeit ïa u pud u sam jong ka Assam – Meghalaya, ka jingtyrwa ban pyntreikam ïa ka projek pynmih bording bad tan um khnang ban weng ïa ka jingshlei um ha sor Guwahati.
“Ngi la rai ban ïakren bad ka NESAC ban leh ïa ka jingwad kaba bniah ha kaba ïadei bad ka jingring dur lyngba u Satellite, la ka long ha ki jaka khlaw bapher bapher bad la ka dei ka jingtuid um na ki bynta bapher bapher,” ong u Myntri Rangbah ka Jylla Meghalaya bad Assam ha ka jingïakren bad ki lad pathai khubor hadien ka jingïalang.
Ynda ladep ïa kane ka jingwad bniah ha ki khyndiat bnai ban wan, ngin sa ïakren bad ka IIT Roorkee ban pyntyllun shakhmat ïa ka kam, nangta ngin sa pharia ïa ka jingbishar bniah sha ki sienjam kiba ngi lah ban shim bad ban wad ïa ki lad kiba lah ban pyntreikam na ka bynta baroh ar tylli ki jylla.
Haba pdiang ïa ka jingeh kaba mih na ka jingshlei um ha Guwahati, u Myntri Rangbah ka Meghalaya u la pynpaw ïa ka jingsngewkhia bad ong ruh ba ki ar tylli ki jylla kin ïatreilang ban wad ïa ki lad ki lynti ban pynduna ïa ka jingshlei um ha ka sor Guwahati bad ruh ban wad ïa ki lad ki lynti ban weng ïa ki jingeh jong ki paidbah na ka liang jong ka jylla Meghalaya kiba trei ba ktah bad kiba im kamai japoh.
Na ka liang jong ka Sorkar Meghalaya la ïashim bynta lang da u Myntri ka Sorkar Jylla u Bah Paul Lyngdoh, u Chief Secretary Bah D.P Wahlang bad kiwei kiwei ki ophisar, katba na ka liang jong ka Assam la lamkhmat da u Myntri Rangbah ka Jylla Assam u Himanta Biswa Sarma, ki Myntri Sorkar bad ki ophisar.
