Shillong, Naitung, 05: Ka Sorkar Jylla ka la pynmih ïa ka jingpynbna ïa ki On-street Parking bad No-parking Zone ha ki jaka bapher bapher ka sor Shillong bad buh ruh ïa ka dor ka ban treikam naduh ka 1 tarik, Nailar.
Kane ka jingthmu ka long shi bynta ka jingpyrshang jong ka Sorkar ban pynduna ïa ka dheng kali bad ban pyrkhing ïa ka jingoh dor tam haba pynieng kali.
Ka jingpynbna halor kane yn sa pyntreikam ha ki bynta bapher bapher jong ka Zone kiba hap hapoh ki Traffic Branch bapher bapher kiba kynthup ïa ka Sadar, Madanrting, Laban, Mawlai, Rynjah, Lumdiengjri bad Laitumkhrah.
Ka la wan hadien ba ka tnat Pynroi Sor ka la pynbna ïa ka Meghalaya Parking Policy for Urban Areas, 2025. Ka polisi ka thmu ban pynwandur na ka bynta ban pyrkhing bad ban pynïaid beit ïa ki jingpynieng kali ha ki jaka sor na ka daw ka jingdheng kali kaba jur ha kylleng ka sor Shillong.
Ka jingpynbna ba la pynmih da u Commissioner & Secretary ka tnat Urban Affairs u Dr. Vijay Kumar ha ka 26 tarik Jylliew ka la ong ba T. 20 na ka bynta ki ar shaka bad T. 40 na ka bynta ki kali saw shaka ka dei ka dor ba la buh ïa kiba pynieng harud surok na ka bynta shi kynta, kata, ha ki jaka ba kham thnem bha ka die ka thied bad T. 15 na ka bynta ki thuk thuk ar shaka bad T.30 ïa ki kali saw shaka ha ki jaka ba kham duna ka die ka thied (ne ha ki jaka bym dei ki jaka iew).
Ka tnat ka la thaw ruh ïa ki hynñiew tylli ki Zonal Task Force ba la khlieh da u Additional District Magistrate na ka bynta ban pyntreikam ïa ka rukom pynbeit ïa ki jaka ieng kali.
Da ka jingïasyllok bad ka Public Works Department (PWD) bad ki Dorbar Shnong, ka Zonal Task Forces ka la ithuh ïa ki jaka ban pynieng ïa ki kali harud surok.
Ka jingpynbna ka ong ba naduh ka sngi ba la pynmih ha ka jingpynbna tad haduh ka 1 tarik Nailar yn pyntreikam da ka tnat bad ka Zonal Task Forces khnang ban pynbeit shuh shuh ïa ki rukom shim bai ieng kali bad ka jingïasam ïa ka khajna.
“Kino kino ki jinglum pisa ba khlem ïohbor ne kiba leh beaiñ naduh ka sngi ba la pynmih ïa ka jingpynbna kin shah daiñ kuna katkum ki aiñ,” la maham ka jingpynbna.
Ka tnat kan ïai pynthymmai ïa ka bai lum parking ne ka jingpynbeit ïa ki Zone na ka por sha ka por katkum ka jingpynbeit
Ka Zonal Task Forces da ka jingïasyllok lang bad ki Dorbar Shnong kan pyndep nadong shadong ïa ki kyndon ha kaba lum ïa ka bai ieng kali. Nalor kata, ki lad ki lynti ban pynïasoh ïa ka teknoloji na ka bynta ban lum ïa ka bai ieng kali la ïakren ban ïatreilang bad ka GiZ.
Kane ka jingpynbna kan treikam noh mardor tad haduh ban da pyntip da kumwei pat.
