Shillong, K’lyngkot, 07: Ki nongtrei ASHA kiba don hapoh ka shatri jong ka Meghalaya Asha Workers Union (MAWU) ki la shim da ka rai ban sangeh treikam shipor namar ka jingbym pat siew ka Sorkar ïa ka Incentive lane ka pisa kaba siew tam na ka tulop katkum ka kam ba ki trei.
Ka nongaibuit jong ka Meghalaya Asha Workers Union ka Kong Soni Kharjana ha ka jingïakren bad ki lad pathai khubor ha ka sngi Balang ka la ïathuh ba ka jingïalang jong ka Meghalaya ASHA Workers Union kaba la long ha ka 11 tarik Nohprah, 2025 ka la shim ïa ka rai ban pynsangeh shipor ïa ka jingtreikam namar ka jingpynslem jong ka Sorkar ban siew ïa ka Incentive jong ki ASHA.
Ka Kong Kharjana ka la ïathuh ba kane ka jingsangeh treikam shipor jong ki ASHA kan treikam naduh ka 8 tarik Kyllalyngkot 2026 ha baroh kawei ka jylla Meghalaya.
Ka la ïathuh ba shwa ban shong ïa ka jingïalang, ka Union ka ladep aiti ïa ka shithi sha u Mission Director ka National Health Mission (NHM) bad la pyntip sha ka Union ba ka jingpynslem ban siew ïa ka Incentive ka dei namar ka jingkylla ha ka rukom pynïaid kynthup ka jingthud ha ka ASHA payment app.
“Watla ngi sngewthuh ïa kane ka jingbatai, hynrei ngi ngeit skhem ba kum kine ki jingeh (technical) kim dei ban shim por 7 haduh 11 bnai ban pynbeit,” ka la ong.
“Hadien ba la aipor khatduh ha ka 19 tarik, Nohprah, 2025 bad namarba ym shym la siew pura ïa ki Incentive ka Union ka la shim da ka rai ban pynsangeh shipor ïa ka kam. Kane kam dei ka jingpynsangeh junom, hynrei ka dei ka rai paidbah ban shongthait shipor na ki kam tad haduh ban da siew pura ïa ki Incentive. Kumta, nga pynbna paidbah ba naduh ka 8 tarik u Kyllalyngkot 2026, ki nongtrei ASHA ha ka jylla Meghalaya kin ym ïashim bynta shuh ha kino kino ki kam,” ka la ong bad bynrap, “kane ka jingpynsangeh ka lah ban neh tang shi taiew lane ka lah ban neh khlem buh por katkum ka jubab jong ka Sorkar.”
