Jowai, Nailur, 26: Ka jingiakynad hapdeng ki jaidbynriew Karbi bad ki Khasi-Pnar ka la khie biang ha ka sngi Baar ha ka shnong Lapangap, West Jaiñtia Hills District hadien ba ki Karbi ki la pyndonkam ban siat pyntieng da ki khnam ia ki Khasi-Pnar.
Katkum ka khubor ba la iohlum la iathuh ba uwei u Pulit pahara ha ka shnong Lapangap u la shu lait thaw salit na ka jingshei jong u khnam ba la siat da ki Karbi.
Kane ka jingiakynad ka la jia ha kawei ka jaka rep kaba la tip kyrteng kum ka Tahpat ha kaba ki Karbi kiba la suba ba ki don da ki spah ngut ki la pynthud ia ki Khasi-Pnar kiba leit rep ha Tahpat naduh kine ki khyndiat bnai baladep.
Dang ha kine ki khyndiat sngi, ki Karbi ki la siat da ki jri siat iap ha kaba uwei na ki nongshong shnong u la mynsaw ha kane ka jingjia.
Katkum ki video ba la ioh da u nongthoh khubor na ki paidbah ka shnong Lapangap la sakhi ia ka jingiapyni bor markylliang ha kaba ki Khasi-Pnar ki la pynphai kylla da kaba siat ia ki Karbi da ki jri sait sim. Nalor kata, la sakhi ruh ia ki Karbi kiba kieng atiar da ki Khnam bad ka Ryntieh. La sakhi ruh ba uwei u samla Karbi u la mynsaw haba u maw u la shei na ki bynta jong ka shyllangmat.
Kane ka jingiakynad hapdeng ki Karbi bad ki Pnar ka la jia na ka por sha ka por watla ka Sorkar Assam bad ka Sorkar Meghalaya ki la pyrshang ban iakren pynbeit ia u pud u sam na ka bynta ka wat kaba ar ha kane ka kynti.
Dang ha ka 26 tarik u bnai baladep, ki Pulit ka Saitsama Out Post ki la shu lait thaw da ka said hadien ka jingshah kthong ha ki Karbi ha ka shnong Lapangap. Kane ka jingjia, ka la pynbitar lep ia ki Khasi-Pnar kiba sah ha Lapangap ha kaba jingiakynad ka la nang kynton shuh shuh katba nang mih ki sngi hapdeng kine ki ar jaidbynriew kiba sah ha khappud ka Jylla Meghalaya bad ka Jylla Assam.
Ha kaba iadei bad ka jingjia mynta ka sngi Baar, u Waheh Shnong jong ka shnong Lapangap u Bah Deimonmi Lyngdoh ha ka jingiakren bad u nongthoh khubor u la iathuh katba ki nongrep jong ka shnong Lapangap ki dang leit jngoh ia la ki lyngkha kynsan kynsan la mih ki Karbi kiba la ap ktem da kaba rieh lypa ha ka lawbnap bad siat ia ki nongrep Khasi-Pnar da ki jri siat sim bad da ki khnam.
Katkum ka jingiathuh jong u Waheh Shnong, la suba ba ki Karbi ki la ap ktem lypa naduh mynstep kham pajih na pynthor bad ha ka por ba ki Khasi-Pnar ki la hiar sha ki jaka rep ki la shah siat pynban da ki jri siat sim bad kane ka la pynmih ia ka jingiakynad kaba la neh naduh dang step haduh ban da kem iongreiñ ka bneng.
U Waheh Shnong u la iathuh ba uwei na ki Pulit pahara ka Saitsama Out Post ula shu lait salit na ka jingshei jong u khnamba la siat da ki Karbi.
Kane ka jinghiar jong ki Pulit ka Saitsama Out Post ka long ban tehlakam ia kano kano ka jingiakynad hapdeng ki Karbi bad ki Khasi-Pnar bad na ka liang jong ki Pulit Assam ruh mar mar ki la hiar ban tem ia ka jingkynad khnang ban ym mih kano kano ka jingjia kaba sngewsih ha ka jingialeh ki arliang mamla.
