Shillong, Rymphang, 22: Ki mynder Bangladeshi kiba don kumba 50-60 ngut ki la prong tuh sha pud u sam jong ka shnong Umkiang, East Jaiñtia Hills District ha ka step sngi Saitjaiñ bad lute naphang ïa ki tiar ki tiar jong ki paidbah nongshong shnong.
Halor kane ka jingjia, u Waheh Shnong jong ka shnong Umkiang u Bah Lasting Pala u la ujor da ka ejahar sha ki Pulit jong ka Umkiang Police Patrolling Post, East Jaiñtia Hills District khnang ba ki bor jong ka aiñ kin long kiba peitngor ïa kane ka jingjia kaba pynshongsyier ïa ki paidbah jong ka shnong Umkiang.
U Waheh Shnong u la ong, na ka daw ka jingdon ka elekshon MDC sha JHADC, bun na ki nongshong shnong kiba don ïa ki suloi ba la don laisen ki la hap ban leit aiti noh sha ki bor Pulit bad bynrap ruh ba dei kane ka daw kaba pynlong ïa ki mynder Bangladeshi ban shim kabu da kaba wan rung tuh shapoh u pud u sam jong ka shnong Umkiang lyngba ka khappud.
Katkum ka ejahar, u Waheh Shnong u la pyntip, “ ha ka 22 tarik, Rymphang, 2025 dang step phyrngap, ha ka por kumba 2:00 baje mynstep shi kynhun ki mynder Bangladeshi kiba don kumba 50 haduh 60 ngut eiei ki la rung tuh sha ki iing ki sem jong ki nongshong shnong ka shnong Umkiang, (hajan ka BSF Camp), da kaba pynpait ïa ki tala ïa ki iing jong ki nongshong shnong bad tuh lut ïa ki tiar ki tar jong ki nongshong shnong ka shnong Umkiang kum ki wait, ki mohkhiew, ki lyngka, ki slipar bad ki mar rep kum u kwai bad kiwei kiwei.”
U Waheh Shnong u la pyntip ba ki don ki nongshong shnong kiba la ïohi ïa kane ka jingwan lute jong ki mynder Bangladeshi kiba la pyrshang ban beh ïa ki hynrei kine ki mynder Bangladeshi ki la thmu ban pom pynban da ka wait ïa ki katto katne ki nongshong shnong hynrei ha ka jingïaleh ym shym la don mnao mano ruh ba mynsaw bad mar kumta ki mynder Bangladeshi ki la phet hadien ba ki nongshong shnong kiba la ïoh sngew ïa ka jinghylla ki la mih ban kthong ïa kine ki mynder.
U Waheh Shnong u la kyrpad ïa ki Pulit ban leh eiei katkum ka aiñ khnang ban ai jingshngaiñ ïa ki nongshong shnong kiba shong basah ha ka shnong Umkiang.
