Shillong, Naitung 24: Ki dkhot jong ka HYC Jatap Unit, kaba hab hapoh Sohra Civil Sub-Division, ha ka step phyrngab jong ka sngi Palei, ki lah ïoh bat ïa 4 ngut ki khar Bangla, 2 ngut ki shynrang bad 2 ngut ki kynthei, na jan ka shnong Jatap, Shella Confederacy, katba ki dang thmu ban kiew sha Shillong lyngba ka kali ba don u number MLO5 AA 7005.
Hadien ba la bat ïa katei ka kali kaba la ñiah da uwei u briew u bym dei u Khasi, uba kyrteng u Robindro Biswas, bad haba la kylli pyrthuh ïa kitei ki 4 ngut ba ki dei naei bad thmu ban leit shaei, kim shym la lah ban jubab bad hadien katto katne por ki la pyntip ba ki wanrung na Bangladesh hapdeng ka miet jong ka 23 tarik bad ha ka por mynstep 4:30 ei ei ki lah mih bad thmu ban leit sha Shillong bad hadien sha kiwei pat ki jylla ka Ri India.
Ki dkhot ka seng ki la bat ïa katei ka kali ha ryngkat ki briew ba don hapoh jong ka bad leit rah ïa ki sha ka Camp jong ki BSF kaba don ha Patharghat, Shella bad aiti ha ki BSF ba kin pynlong ïa ka jingtohkit ban lap ksai ïa ka rukom rung jong kine ki briew bad kumjuh ruh ban wad ïa ki ‘dalal’ na India kiba ïarap ha ka ban pynrung tuh ïa ki nong Bangla lyngba ki jaka khappud ha ka dong ka thaiñ.
Kat haduh ka janmiet jong ka 24 tarik, ki BSF ki dang bat ïa kine ki briew baroh ha Camp jong ki bad na ka liang ka Seng kan buddien ba aïu ki BSF ki leh ïa kitei ki briew bad ïa u nongñiah jong katei ka kali, ong ka kyrwoh ba la phah da u President ka HYC Jatap Unit, u Pyndap Shongwan.
