Shillong, Nohprah, 30: Ka jaitbynriew Hynñiewtrep Hynñiewwasa ha ka sngi Baar ka la rakhe kynmaw tympang ïa ka lyngkhuh sngi ïap kaba 163 snem jong u Woh Kiang Nangbah.
Ki sengbhalang bapher bapher ba kynthup ïa ka KSU, ka FKJGP, ka HITO ha ryngkat ka jingdonlang u Chairman jong ka North East Students Organisation u Bah Samuel B. Jyrwa ki la ïa lum hakhmat u durmot jong u Kiang Nangbah uba ïenga hakhmat Civil Hospital Shillong ban kynmaw burom ïa kane ka sngi.
Ki dkhot bad ki nongïalam jong ki sengbhalang ki la leit buh syntiew hakhmat jong une u durmot kum ka dak jingkynmaw burom bad ha ka jingkren jong ki, ki la pynkynmaw biang ïa ka jingdawa ïa ka Inner Line Permit kaba dang sah pongding ha kti ka sorkar India watla ka iingdorbar thaw aiñ jong ka jylla ka la ai jingmynjur ban pyntreikam ïa kane ka aiñ ha ka jylla Meghalaya ban ïada na ka jingrung kyrthep jong ki mynder ri bad ki briew kiba nabar ka jylla.
Ki nongïalam jong ki kynhun bapher bapher ki la ban jur ïa ka Sorkar India ba ka dei ban shimkhia ïa kane ka mat namarba ka jylla Meghalaya ka don hapdeng ka jingbym shngaiñ namar ka jingjyllei na ka jingrung kyrthep ki briew kiba nabar bad ki mynder na ka ri Bangladesh.
U President ka Khasi Students Union (KSU) u samla Lambokstarwell Marngar haba kren ha ka jingïalang u la ong ba ka jingnud ka Bangladesh ban byrthen ban kurup ïa ka thaiñ Shatei Lammihngi ka dei na ka daw ba ka la ïohi lypa ïa ka jingshah niew bein jong ka thaiñ ha ka Sorkar India.
U la ong ba ka jylla Meghalaya ka la dawa ïa ka Inner Line Permit (ILP) kaba la mynjur da ka Iingdorbar Thawaiñ ka jylla hynrei ka Sorkar India ka leh pynban da khongpong bad ka wanrah da ka Citizenship Amendment Act (CAA) ban ai jaka ïa ki ritpaid na kiwei pat ki ri ba kin long ki nongshong shnong ba pura jong ka India katba ki rit paid pat kiba don ha kane ka jylla ki shah nion bein ha ki heh paid jong ka ri India bad ïa kane la sakhi ruh ha ka sngi Christmas.
U la ong ba u woh Kiang Nangbah u la shah phasi marwei ha ka Sorkar Phareng hynrei kaba kham ima ka long ba ki don ki mendieri ki mut ban phasi ïa ka jaitbynriew hi baroh kawei.
U Chairman jong ka North East Students Organisation (NESO) Bah Samuel Jyrwa u la pynkynmaw ïa ka jingshah nion bein ki paidbah na ka thaiñ shatei lam mihngi ha ki heh paid jong ka ri India haba ki don shabar na la ka thaiñ.
U la ong ba ka daw ka jingshah nion bein ka dei tang na ka daw ba ka durkhmat jong ngi ka pher na ki nong India bad tang na kane ka daw ngi shah kren bein bad shah nion bein ha kaba dang shen uwei u samla na ka jylla Tripura u la duhei la ka jingim na ka jingshah shoh dusmon.
“Ngim dei ban ailad ba ki briew kiba nabar la ka dei na ri India ne na Bangladesh ruh ba kin wan leh trai khlieh ha kane ka jylla,” u la ong.
