Shillong, Nailur, 06: Ki khun ki hajar jong ka Hima Sohra ha ka sngi Thohdieng ki la leit ujor ha u Assistant Commissioner jong ka tnat Transport u Bah A Tyngkan halor ka jingkit palat pud bad ka jingïaid lait jong ki trok na ki Weigh Bridge kiba kit ïa u mawshun na Majai ban shalan sha Bangladesh.
U Bah Welborne Bynnud ha ka jingïakren bad ki lad pathai khubor u la ïathuh ba ka jingkit palat pud jong ki trok kit mawshun kiba khaïi sha Ri Bangladesh lyngba ka Majai Land Custom Station kam dei shuh kaba thymmai hynrei ki jingujor ba la bun bun sien ki long kumba leit pynsngew sha ki skhor ba kyllut bad sha ki khmat bym kwah peit da ki ophisar Sorkar khamtam na ka tnad Transport bad na ka tnat PWD (Roads).
U la ong ba ka jingïoh lad jong ki trok kit mawshun ban kit palat pud na kaba la buh 12 ton ka la wanrah ïa ka jingjulor kaba shyrkhei ïa ki lai tylli ki bynta jong ka surok, kata, ka surok na Sohbar, Tharia kaba pynïasoh bad ka Majai lyngba ka jingkieng Umdud bad ka surok na jingkieng Weijapuh shaduh Lailad, Umdud kiba dei peit da ka tnad PWD (Roads).
Halor kane, u Bah Bynnud u la ïathuh ba u Asst. Commissioner u la ong ba un sa ïakren bad ki bor ba dei khmih jong ka tnat Transport ba ki dei ban leit jurip ïa ka jingïaid lait jong ki trok kit mawshun na ki Weight Bridge bad ka jingkit palat pud.
Kane ka surok ka dei kaba dang shu dep shna da ka Hima Sohra dang shen hynrei na ka jingslap bad na ka jingïaid jong ki trok kiba kit palat pud kam shym la neh bad shan slem.
Haba wad ïa ka daw balei ki trok ki ïohlad ban kit palat ïa ka 12 ton na ka kyndon ba la bthah da ki bor synshar jong ka East Khasi Hills District, ki katto katne ki nongkhaïi ki la kynnoh ba ka dei hi na ka jingbym husiar bad na ka jingleh khnang jong ki bor ba dei peit ïa ki ar tylli ki Weight Bridge jong ka tnad Transport kiba don hashwa ban poi ha ka jingkieng Umdud bad kumjuh ka Weight Bridge kaba don ha shwa ban poi ha Lailad, Umdud.
Ki la kynnoh ba kiba peit ha kine ki Weight Bridge ki don ka jingïadei sopsop bad ki katto katne ki nongkhaïi bad ki shah ban ïaid palat lai ne saw shah ka jingkit ki trok na kaba la buh da ka Sorkar ban kit.
