Shillong, Nailur, 30: Ka Sorkar Meghalaya ka la mynjur ban ai jingkyrshan pisa ïa ka Garo Hills Autonomous District Council (GHADC) ba kan dup lah ban siew dep ïa ka tulop bad ban pynthikna ba ki nongtrei kin ïoh noh ha ka tulop ha ka por kaba biang.
Hadien ba la wai ka jingïalang Kynhun Myntri, u Myntri Rangbah ka Jylla u Conrad K Sangma u la pynbna ba ka Sorkar Jylla kan sa pyllait noh shwa ïa ka pisa kumba 50 klur sha ka GHADC, kaba kynthup ïa ka song pisa T. 24-25 klur kaba dei ka bhah jong ka Council ba ïoh lum na ki khajna bad sa T. 25 klur ban ïoh siew dep ïa ka tulop jong ki 12 bnai ba la leit noh ka ban sdang naduh ka 1 tarik, Naiwieng.
Ïa kane ka rai la shim da kaba pynshong nongrim katkum ka jingai jingmut jong ka Committee kaba hap hapoh ka jingkhmih jong ka tnat District Council Affairs hadien ba ka Sub-committee ka la aiti ïa ka kaiphod dang shen.
“Hadien ka jingïatai kaba bniah bad ka Sub-committee bad ka jingïatai kaba bniah bad ka EC jong ka GHADC bad sngewthuh ïa ki jingdonkam jong ki, ka Sorkar Jylla bad ka Kynhun Myntri mynta ka la rai ban pyllait lypa ïa ka pisa kaba dei ka bhah jong ka Council khnang ba kin dup lah ban pynkhuid noh ïa ka tulop ba dang sahteng kumba 12 bnai bad ban dup lah ban siew ïa ka tulop ha ka por kaba biang bad ka kynhun myntri mynta ka sngi ka la mynjur ban siew noh lypa ïa ka bhah jong ka Council,” ong u Myntri Rangbah ha ka jingïakren bad ki lad pathai khubor.
“Kumba 24-25 klur tyngka kaba ngi don kum ka bhah jong ki hi na ka khajna kaba don bad ka Sorkar jylla. Kata ka dei ka pisa jong ki kaba ngin sa pyllait sha ki. Sa kawei pat ka ngin sa siew kumba 25 klur tam ka pisa,” u la ong bad bynrap ba ïa ka pisa yn sa pyllait sha ka ESCROW Account jong ka GHADC ban pyntikna ba ïa ka pisa yn pyndonkam na ka bynta ka ka jingsiew tulop.
U la pynshai shuh shuh, “kumba nga la ong kane kam dei kano kano ka jingïarap ne kano kano ka jingtuklar, kam shym la don ei ei kaba la rai mynta ka sngi. Tang kawei kaba la rai ka long ba ngin pyllait lypa ïa ka pisa na ka khajna bad ïa ka bhah kaba dei hok ka jong ki bad nangne shakhmat ki don katto katne ki jingsiew lypa kiba ki donkam khnang ba kin dup lah ban siew ïa ka tulop sha ki nongtrei.
U Myntri Rangbah u la pyntip ruh ba ka GHADC ka la mynjur ban pdiang ïa ka jingthung ïa u ophisar IAS kum u Principal Secretary ryngkat ka jingtyrwa ban pynlong ïa u Deputy Commissioner kum u ex-officio Principal Secretary.
Ki nongtrei jong ka GHADC kiba don kumba 1200-1300 ngut ki la soi ïa ki dulir ban pdiang ïa ka jingïarap pisa, bad kumba 800 ngut ki nongtrei ki la soi ruh ïa ka jingmynjur da ka jingthoh.
“Ki (GHADC) ki la pdiang ïa ka bad ha ka jingshisha ngi la ïoh ïa ka Signature Campain da ka jingthoh jong ki nongtrei kumba 800 ngut eiei ki la soi bad phah ïa ki kot ki sla sha ka Sub-committee kiba pynpaw ba ki pdiang ïa kane. Na ki 1200-1300 ngut ki nongtrei, kiba bun na ki ki la thoh ïa ngi bad phah ïa kata. Ha,oid, ka EC kan sa rai shuh shuh kumno yn siew ïa ka tulop hynrei kumba nga la ong ngin sa pyllait lypa ïa ki bhah jong ki”, u la bynrap.
Shuh shuh u Myntri Rangbah u la pyntip ba ka Sorkar Jylla ka la ai jingkyrshan ïa ka GHADC da kaba pyllait ïa ka pisa bad ai shuh shuh ka pisa ha ki lai snem ba la leit noh.
“Kam dei ba ngi leh tang mynta hynrei wat ha ki por ba ladep la pyllait pisa sha ka GHADC ba kin dup lah ban siew tulop. Ha ka jingshisha ha kine ki saw snem shiteng kumba 42 bnai tulop la siew bad ka pisa kaba heh na kata ka la mih namar sa shisien ngi la pyllait katto katne ka pisa kum ka jingkyrshan ïa ki. Namarkata, ngim shym la tuklar eiei ruh em hynrei ngi shu ai jingkyrshan ha ka liang ka pisa ka tyngka,” u la bynrap.
