Shillong, K’lyngkot, 15: Ka Sorkar Jylla ka la pynbna ïa ka rai ban pyntreikam ïa ka Town and Country Planning Scheme, ban wanrah ïa baroh ki kynhun hapoh kawei ka rynsan khnang ban ïoh ïa ka jingïatreilang ha kaba ïadei bad ka jingpyntreikam ïa ka Town and Country Side Planning ha ka jylla.
Ïa kane ka rai la mynjur da ka Kynhun Myntri ka jylla ha ka sngi Balang.
Haba kren sha ki lad pathai khubor, u Myntri Rrangbah ka jylla u Conrad K Sangma u la ong, “kane ka skhim ka long ban wanrah ïa baroh ki kynhun naduh ki dorbar shnong, rangbah shnong, ki Nokma, ki raid, ki elaka. Ka wanrah ruh ïa ki Autonomous District Council (ADC) , ka wanrah ïa ki paidbah ha kajuh ka thup bad ka wanrah ruh ïa ki tnad bapher bapher kiba don bynta ban plie ïa ki jingïathir ïatai halor kiei ki kam pynroi ba dei ban leh.”
“Kaba shai ka long, lada tang uwei u nongshim bynta um ai ka jingmynjur, ka jingthmu kan ym lah ban ïaid shakhmat,” u la ong.
Halor ka daw ba la shim ïa kane ka rai, u Sangma u la ong, “ha ka Master Plan na ka bynta ka Shillong, ki don la jan 290 square kms ki jaka, kaba kynthup ïa ka thaiñ Mawkhanu bad Diengpasoh. Kaei kaba jia ha kine ki thaiñ, ka long ba ha ka shnong, ha ki katto katne ki tnad, ha ka kyrdan jong ka District Council, ha ka kyrdan jong ka Dorbar Shnong, ki riewshimet ki leh katkum ka mon bad ka jingkwah jong ki bad katkum ki jingthmu jong ki. Kumta ka jingïatreilang kam don na ka bynta ka jingthmu jong ka sor ha ki jaka kiba hap hapoh ka Municipal bad shabar jong ka Municipal hynrei namar ka jingroi stet jong ki shnong, donkam ban pynthikna ba kan don ka jingïatreilang hapdeng ki kynhun bapher bapher.”
“Kumta ha ki por ba mynshuwa ngim shym la don ka jingïatreilang hapdeng ki kynhun bapher bapher, uwei pa uwei u leh katkum ka jingsngewthuh shimet bad kane ka la wanrah ïa ka jingkharoi ba khlem da saiñdur bha ïa ki jaka ba thymmai kiba don shajan ka sor bad kiba dang sdang ban roi, kiba ka long ka nongrim ka jingpynkylla sor,” u la ong.
Da kaba pynpaw ba kane ka skhim kan ailad ïa ka rynsan ban kham pynïatylli halor ka jingthmu jong ka sor, u Sangma u la ong, “…kane ka skhim kyrpang kan ym tuklar ïa kano kano ka hok jong kino kino ki tnad ne ki rangbah shnong ne ka District Council. Kan long tang ka rynsan ban ailad ïa ki kynhun bapher bapher ban ïathir ïatai lang.”
“Ki donkam ïa ka jingpynbeit thymmai bad da ka jingïatreilang bad ka tnat Pynroi Sor bad ban wanrah ïa kane ka skhim ba kyrpang yn plie lad ban pynroi ïa ka Sor da ka jingïatreilang bad ki kynhun bapher bapher. Kan sa don ruh ka jingpynbeit thymmai ha ka Meghalaya Town and Country Planning Act bad ka Ordinance ban ailad ban wanrah ïa kane ka skhim,” u la ong.
Shuh shuh u Myntri Rangbah u la pyntip ba ha ka jingwanrah ïa kane ka skhim, yn sa pynbeit thymmai ïa ka Building Byelaw ruh kumjuh.
