Shillong, Jylliew, 11: Ka President jong ka Meghalaya Pradesh Mahila Congress (MPMC) Kong Joplyn S. Shylla, ha ka sngi Balang ka la pynpaw ïa ka jingsngewkhia kaba khraw halor ka jingkiew sted ka jingngat ki samla ha ki kam sniew ha kylleng ka ri.
Ha u kyrwoh, ka Kong Shylla ka la ong, ki samla ki dei u budlum jong ka lawei jong ka ri bad ka jaitbynriew hynrei ka jingkiew ha ka jingdon bynta ki samla ha ki kam thombor bad ki kam beaiñ ka dei ka jingeh kaba khraw.”
“Kane ka pyni shai kdar ïa ki jingeh ba ki khun samla jong ngi ki shem bad kim don lad shuh da kumwei hynrei ban shu ngat ha ki kam sniew kiba ktah shibun ha ka imlang sahlang kiba kum ka jingbym don kamai, ka jingbym don jingai jinghikai na la ing, ka jingdih droks bad ka jingshah ktah na ka Social Media,” la pynpaw ka Kong Shylla.
Ka Kong Shylla ka la kyntu ïa ka Sorkar Pdeng bad ïa ka Sorkar Jylla ba kin shimkhia ban khanglad ïa kane ka jingeh lyngba ka pule puthi ba biang, kaba skhem, ki prokram ai mynsiem ïa ki samla da kaba ïarap ban ai ki kam ki jam, bad ki aiñ ban pyrkhing ïa ki kam sniew ki dei ban long kiba tyngeh.
Ka la kyntu ruh ïa ki longïing, ïa ki nonghikai bad ïa ki paidbah ba kin ïashim bynta ban ïarap bad ban ïasyllok ïa ki samla ban ïaid ha ka lynti kaba dei.
