Shillong, K’lyngkot, 24: Dang ha kine ki sngi ki nongïalam ka seng Congress ha kane ka jylla, ki la kynnoh ba Sokar Jylla ka la khang ïa ka jingleit u Rahul Gandhi sha USTM ha Ri-bhoi hadien ka jing pynbor kaba la wan na Assam bad na Delhi.
Ha u kyrwoh ba la phah sha ki lad pathai khubor, ka BJP ka la ong, “phewse ka USTM ka la pynshai paidbah lyngba ka Social Media ba ka seng Congress kam shym la ïoh jingbit na ki bor synshar ka Ribhoi District, kumta ka USTM kam banse ban pynsangeh noh shwa ïa ka jingai jaka ban pyndonkam da ka seng ha ka sngi ba wan u Rahul Gandhi. Ka jingkhein sting jong ka seng Congress ban pynbiang ïa ki kot ki sla ban pynlong ïa ka jingïalang ka pynpaw ïa ka jing bymkhein snep jong ka seng Congress ïa ki bor sorkar bad kane ka pyni shai ïa ka jinglong barieh jong ki nongïalam jong kane ka seng.”
“Ka BJP Meghalaya ka kyrpad ïa ki nongïalam ka seng Congress ba kin long shida noh ha ka rukom treikam jong ki bad lada ka long kaba khia haduh katta katta ïa ki, kim dei ban shu kren laplah kumne manla ka por. Kane ka jingbuhrieh ïa ki jingshisha bad ban kynnoh khlem nongrim jong ka seng Congress ka pynpaw ïa ka jingjaboh ka jingbymlerkam bad ka jinglongbuit poh jong ki nongïalam ka seng,” la ong ka BJP.
“Na ka por sha ka por ka seng Congress ka ju kynnoh ba ka BJP ka synshar donbor hynrei ka la klet mo ïa ka Emergency? Mano ba synshar donbor ïa ka ri ha kito ki snem hato ym dei ka seng congress? Mano ba ju mlien ban wanrah ïa ka president rule bad ban weng jubor ïa ki sorkar jylla ba la jied da ki paidbah, hato kam dei ka seng congress? Mano ba la set jubor bad khang ïa ki nongthoh khubor ban kren laitluid, hato kam dei ka seng Congress? Kane ka rukom ban shu kynnoh laplah bad ban kdew kti ka pawshai ba ka seng Congress kam don jingmut eiei ban ai ka jingshakri kaba khuid sha ki paidbah,” la kynthoh ka BJP.
“Ka por ka la kylla ba ki nongshong shnong ki kwah ïa ka jingsynshar kaba khuid, kaba ïohi paw bad kaba don ïa ka jingkular kaba skhem. Balei ka BJP ka jop elekshon na ka por sha ka por dei namarba ka la lah ban wanrah ïa kita ki jingkylla baroh bad ki paidbah ki hun ïa kata,” la pynksan ka BJP.
“Kumba ka ktien “Satyameva jayate” ka ong ba ka hok kan ieng rasong, ka pawshai na kane ka jingjia ha USTM ba ka seng Congress kan sa duh biang ïa ka jingshaniah jong ki paidbah ha kane ka elekshon MP ban sa wan,” la ong ka BJP.
