Shillong, Jylliew, 13: U Myntri ka tnat Jngohkai Pyrthei ka Sorkar Jylla u Bah Paul Lyngdoh ha ka sngi Thohdieng u la pyntip ba ka jingtuid jong ki nongjngohkai pyrthei sha Sohra ka la nang kiew watla ka la mih ka jingpynbudnam sniew dang shen ïa ka jylla Meghalaya halor ka jingshah pynïap jong u nongjngohkai pyrthei na Indore, Madhya Pradesh.
Katkum ka jingong jong u, la khmihlynti ba ka jingpoi jong ki nongjngohkai pyrthei kan kynjoh 20 lak hadien ka tamasa Cherry Blossom ka ban sa long ha une u snem.
“Katba ngi dang kren mynta, ka jingwan ki nongjngohkai pyrthei ha Sohra ka la nang kiew. Ki la nang ïai tuid manla ka sngi ki nongwan jngohkai. Wat lada ïa ka jingjia ym pat lah ban pynkut, ka jingwan ki nongjngohkai pyrthei ka dang long hi kumjuh. Mynta ba la pynkhuid ïa ka jingshah pynbudnam sniew ïa ka kyrteng jong ka Meghalaya ngi dang shu ong ba kan kham bun ka jingwan ki nongjngohkai pyrthei bad ngi khmihlynti ba kan kynjoh sha ka 20 lak ngut haduh ka tamasa Cherry Blossom,” la ong u Bah Paul ha ka jingïakren bad ki lad pathai khubor.
Haba kylli, u Myntri ka tnat Jngohkai Pyrthei u la ong ba ka jingsdang jong ka Sorkar ban phah panmap ka la long hadien ba ki la mih ki jingkynthoh ba laiphew jait bad kynthup ruh kiba kynshoit ïa ka jingïaumsnam pyrshah ïa ki paidbah da ki briew kiba dei na ka jylla Meghalaya hadien ka jingjia ba sngewsih ha ka shnong Sohra.
“Ha ka sngi kaba bud, ki lad pathai khubor ba heh kynthup ïa ka Times of India, ka Republic TV nalor ki Private Vloggers ki pynmih ïa ka jingpanmap. Kumta ka la ïahap bad ka jingdawa jong ngi,” u la pynpaw.
Haba pynpaw ba ka kam ka la kut hangne, u Bah Paul u la ong, “em, ngi la kren shai ba lymda phi panmap ngin sa ujor da ka Defamation Suit bad ngi la ujor ruh ïa ki ejahar ruh kumjuh. Mynta namarba ki la shim biang ïa ki kyntien jong ki kum ka nuksa ki bahaïing jong u nongïap ruh ki la panmap paidbah na ka Sorkar bad ki paidbah jong ka Meghalaya, ka kam ka la kut noh hangta.”
Shuh shuh u Myntri u la pyntip ba ka Jylla ka la don lypa ïa ka tourism app, kaba buh jingthoh ïa ka leit ka wan jong ki nongjngohkai pyrthei, kynthup ki kali ne kino kino ki jingleit jingwan ba ki pyndonkam bad ka jingpynrung kyrteng ïa baroh ki nongwan kai ha kiba bun ki Homestay, Resort bad ki Hotel.
“Mynta, ka jingpyndonkam ïa kane ka App ka long kumba 50% bad mynta ngin pyntreikam pura ha baroh ki Homestay, Resort bad kiwei kiwei jaka ba don jaka sah ki dei ban shim kyrteng ïa baroh ki nongwan jngohkai kai,” u la bynrap.
Ha kajuh ka por, u Myntri u la ong ba ka tnad ka ladep pynmih ïa ka jingpynbna na ka bynta ki samla kiba don jingthmu kiba nang bha ïa ka ktien Khasi, Garo, Phareng bad Hindi ba kin rung sha ka skhim Tourist Buddy bad hapoh kine ki ar bnai ban wan ngi dei ban lah ban thungkam da ki spah ngut ki Tourist Buddies.
 | ReplyForwardAdd reaction |
