Shillong, Risaw, 16: U nongïalam ka BJP uba long ruh u MDC ka Tura u Bernard N. Marak ha ka sngi Palei u la kob ba u long uba kloi ban ïatai nia bad u Myntri Rangbah ka Jylla u Conrad K. Sangma ban batai kham bniah halor ka jingkynnoh ba ka don ka jingtih ïa u Uranium ha ka jylla.
U la kynnoh ba ka don ka jingïadei kaba jan bha hapdeng ki nongkhaii dewiong, ki ophisar bad ki nongïalam saiñ pyrthei ha ka jingkynnoh tih bad shalan dewiong beaiñ ha ka thaiñ rilum Garo.
“Watla katta ruh, lada u Myntri Rangbah ka Jylla u don ka jingangnud shisha ban weng ïa ka jingtih marpohkhyndew beaiñ, u lah ban khot ïa ka jingïalang ne khot ïa nga ruh na ka bynta ka jingïatai ne jingïakren kaba laitluid ha ki lad pathai khubor. Nga long uba kloi ban ïakren da kaba khuid, ka jingsynshar kaba bha bad ka jingshngaiñ jong ki paidbah, khlem da don kano kano ka jingthmu kaba rieh, namarkata ngan kham sngewbha ban pyntip lyngkot ïa u shaphang kine ki kam be-aiñ baroh kiba buh jingma jur ïa ka jingshngaiñ jong ka Jylla bad ïa ki paidbah,” la ong u Marak ha u kyrwoh.
Halor ka jingkyntait jong u Myntri Rangbah ïa ka jingkynnoh ba ka don ka jingtih uranium ha rilum Garo, u nongïalam ka BJP u la ong, “la khmihlynti lypa hi ba u Myntri Rangbah ka Jylla un pynrem ïa ki jingkynnoh ba la saphriang bha ïa ka jingtih bad jingshalan marpoh khyndew beaiñ ha ka Jylla hynrei ka dang long tang ka kam buhrieh kaba paw. Watla nga la kyrpad bunsien, ngam shym la lah ban ïoh por ban ïakren bad u halor kine ki mat.”
U la kam ba watla ka jingtih be-aiñ ïa u Uranium ka la jia ha ka Jylla ar snem mynshwa, hynrei ha kaba sdang ka Jylla ka la kyntait ïa ka haduh ba ngin da pyntip sha ki ophisar jong ka Ministry of Home Affairs, kaba la pynlong ïa ngi ban tuklar bad pynsangeh noh ïa ki kam tih be-aiñ ha rilum Khasi.
“Ka Sorkar barim ka la tip bad ka la donkti hynrei ka la kyntait ïa kano kano ka jingleh bakla lyngba ki lad pathai khubor bad sha ka Sorkar Pdeng,” u la kam.
U Marak u kynnoh shuh shuh ba u Myntri Rangbah ka Jylla ba mynta u lah ban ym don jingtip shaphang ka jinglong jingman kaba mynta, hynrei u pynpaw ka jingshaniah ba ka Sorkar Pdeng kan tuklar ban pynsangeh ïa kine ki kam.
“Watla u Myntri Rangbah ka Jylla u lah ban ym don jingtip shaphang ka jinglong jingman kaba mynta, ngi ngeit skhem ba ka Sorkar Pdeng kan tuklar, haba kheiñ ïa ka jingbym lah ban ngeit na ka jingbym kheiñ snep ïa ki jingthmu saiñ hima sima kiba don hapoh jong ki kiba pynlong ïa kine ki kam be-aiñ kiba nga ngeit ba dei ban peit bniah bad sangeh noh khnang ban ym pynsniew ïa ka jinglong jingman,” u la ong.
U nongïalam ka BJP u la bynrap da kaba ong, “ka jingtohkit jong ngi halor ka jingtih dewiong beaiñ bad ka jingshalan beaiñ ha ka thaiñ rilum Garo ka la pynpaw ïa ka jingïadei kaba jan bha hapdeng ki nongkhaii dewiong, ki ophisar sorkar, bad ki nongïalam saiñ pyrthei.”
U Marak u buh jingkylli hato lah ban khmih lynti ïa ka mon saiñ pyrthei kaba shisha na ki nongïalam saiñ pyrthei jong ka jylla ban weng ïa kine ki mat.
Kum ka jingmih na ka jingpynpaw ïa ki jingbakla ha ka jingsynshar ha ka sorkar Jylla, ki bor synshar ki la pynlong sohpdung ïa nga lyngba ki mashin jong ka ha kine ki snem namar ka jingpynpaw pyrthei ïa ka jingbamsap kaba la saphriang hapoh ka rukom synshar, kaba ktah ïa ki paidbah,” u la pynpaw.
