Shillong, K’ Lyngkot, 18: U Lat ka Jylla, CH Vijayashankar ha ka sngi Saitjaiñ u la ong ba u long uba kloi ban shon muhor ïa ki Aiñ-rew (Bill) jong ki Autonomous District Council (ADC) lada ki long kiba shong aiñ.
Ïa kane u la pynpaw haba kren kum u kongsan ha ka Dorbar Iktiar Paidbah ba la pynlong da ka Khasi Hills Autonomous District Council (KHADC) ha madan Polo.
Ha kane ka sngi la sakhi lang da u Symbud Myntri Rangbah ka jylla u Bah Prestone Tynsong uba khmih ïa ka tnat District Council Affairs (DCA), u Chief Executive Member (CEM) ka KHADC Bah Pynïaid Sing Syiem, u Nongïalam ka Liang Pyrshah Bah T.W Chyne, ki MDC bad ki nongïalam jong ki Synjuk ki Nongïalam Shnong, ki Synjuk ki Rangbah Kur bad kumjuh ruh na kiwei kiwei.
“Ka dei ka kamram jong nga ban ïatrei lang halor ki kam pynroi ba la shim da ka Sorkar Jylla bad lada nga lap ba ki dei kiba shong aiñ nga kloi ban mynjur ïa ki aiñ ki ADC lyngba ka jingai jingmut jong ka Sorkar Jylla,” u la ong.
U Lat u la ong ruh ba u sngewburom shi katdei eh ban ïohsngew ïa ka jingdon jong ki jait ki khong bad ki riti dustur ha kane ka jylla.
“Nga sngew ba ka long ka burom ban ithuh bad pynkupbor ïa ki kynhun bapher bapher kiba la shimkhia ha kaba ïadei bad ka jingdonkam ban ithuh ïa ki seng kur bad kiwei kiwei. Nga ai burom ïa ki longkmie bad ka jingai jait kmie kaba long kaba kyrpang bha ha kane ka jylla,” ong u Vijayashankar.
Ha kane ka jingïalang u Lat u la pynpaw ba dei halor kane ka jingïohi jong u ïa ka riti dustur ha kane ka jylla kaba la pynlong ïa u ban ai jingmynjur ïa kiba bun ki Aiñ-rew ba la mynjur da ka KHADC.
“Na kata ka daw nga la mynjur ïa ki aiñ jong ka KHADC ban aibor bad pynkupbor ïa ki kynhun bapher bapher bad nga ai mynsiem ïa baroh ba kin pynneh ïa ki rukom treikam jong ki seng bad ki Dorbar Shnong kiba ïaid lang bad ki riti dustur,” ong u Lat.
“Nga kyntu ïa ki District Council ba kin ïatrei lang bad ka Sorkar Jylla khamtam ha kaba ïadei bad ka pule puthi kaba long kaba kongsan bha ha kane ka por kaba mynta. Ngi donkam ban pynurlong ïa ki jingphohsniew ban kyntiew ïa ka jylla baroh kawei da kaba ïatreilang,” la bynrap u Lat
Ha kane ka sngi la pynbam smai na ka bynta ban pynneh ïa ki riti dustur kaba kynthup ruh ïa ka jingpynduh jait ïa u drok na kane ka jylla.
U Lat u la ong ba kum u khliehduh ka jylla u kwah ban wanrah ïa ka roi ka san bad ka bha ka miat jong ki nongshong shnong.
