Shillong, Nailur, 20: Ha ka sien ba nyngkong eh la pynlong ïa ka lympung ïathir ïatai jong ki nongthoh khubor ba la tip kum ka 1st Meghalaya Media Meet 2024 halor ka phang “Redefining Journalism in the Digital Age.”
Ïa kane ka lympung kaba la long ha ka sngi Thohdieng ha Vivanta, Shillong, la ïashim bynta lang da u Myntri Rangbah ka Jylla u Conrad K. Sangma bad ka Myntri ka Sorkar Jylla kaba khmih ïa ka tnat Information & Public Relations ka Dr. Mazel Ampareen Lyngdoh, u Commissioner & Secretary ka tnat Information & Public Relations u Vijay Mantri bad u Director jong ka I&PR u Malthus Sangma.
Haba kren ha kane ka sngi u Conrad Sangma, u la ong ba dang bun ki kam ba dei ban leh ban ithuh ïa u synniang u bynhei jong ki nongthoh kotkhubor bad bynrap, “kane ka long haba ma ngi kum ka Sorkar ngi sngew donkam ban don kum kane ka jingïalang ban ithuh bad ban pynkup burom ïa ka jingtrei shitom da ki nongthoh kotkhubor, ka jingïakynduh lang bad ka jingïamir jingmut ka long kaba donkam na ka bynta ka jingmyntoi kaba khraw ha ki lad pathai khubor ban pynthikna ba kan don ka jingpathai ïa ki jingtip kiba ai jingmynmyntoi ïa ki paidbah bad ban pdiang ruh ïa ka jingwan jong ki kor ki bor ba thymmai.”
Da kaba pynpaw ba ka kam thoh kotkhubor kam dei eh tang ha kaba thoh, u Myntri Rangbah u la ong ba ka por ka la donkam ruh ban pdiang ïa ki jingkylla ha ka teknoloji bad ban pdiang ïa ki lad bapher bapher ha ka kam thoh kotkhubor, ban don ïa ki jingshah hikai pyntbit bad ki jingleit jngoh de sha ki bynta bapher bapher ka jylla da ki lad pathai khubor.
U Myntri Rangbah u la ïai ban ruh ïa ka jingdonkam ban don ka jingkynthoh kaba dei kaba ju long hi ka rukom ha ka synshar paidbah. U la bynrap ba kane ka juk ba mynta, namar ka jingwan jong ka teknoloji la donkam ban dro ïa u pud hapdeng ki jingpyntip, ki jingsngew bad ka khubor. “Mynta, la ka dei ka jingsngew lane ka jingpyntip la shu ïohi beit kum ka khubor bad kaba donkam ka long ban don ïa u laiñ uba pynïapher,” u la ong.
Shuh shuh u Myntri Rangbah u la pynkynmaw ruh ïa ka bynta bakongsan ban ïoh ïa ka jingshahniah jong ki lad pathai khubor.
“Ngi lah ban pynsngewtynnad ïa kiei kiei tang shipor hynrei ban pynneh ïa ka jingshaniah ka dei kaba baroh ngi dei ban ïaleh katba ngi nang ïaid shakhmat bad nga ngeit ba ka jingshaniah ka dei ka bynta kaba kongsan tam jong ka kam thoh khubor,” u la bynrap.
Katba ngi nang jaam shakhmat, ngi khmih lynti ïa ki jingkynthoh kiba tei jong phi bad ngi ïatreilang na ka bynta ka jingmyntoi jong ka imlang sahlang”, u la ong.
U la pynthikna ruh ïa ki lad pathai khubor ba ka Sorkar kan sa peit bniah ïa ki katto katne ki jingeh kiba la pynpaw da ki lad pathai khubor jong ka jylla.
Ka Dr Ampareen Lyngdoh haba kren ha kane ka lympung ka la ong, “ka kynhun ki lad pathai khubor ka peit sha ka Sorkar na ka bynta shibun kiei kiei bad ngi sdang mynta ka sngi ban snoh kti bad ki lad pathai khubor bad ban peit ïa ki lad ki lynti ha kaba ngi lah ban pynbha ïa ka jingim bad ka kam ka jam jong ka kynhun ki nongthoh khubor bad ithuh ïa ka jingtrei shitom kaba ki nongthoh khubor ki trei.”
Haba pynpaw ïa ka jingkmen ba kawei na ki phang jong ka jingïathir ha kane ka sngi ka long halor ka jingtehlakam ïa ki khubor thok bad ki jingpyntip lamler, ka Myntri ka la ong, “nga kyrmen ba ki jingïakren kiba mynta ka sngi kin ïamir jingmut halor ki lad ki lynti kiba bha tam ban weng ïa kane ka jingeh haba ha kine ki por ba mynta ki jingktah jong ki Social Media ki long kiba jylliew bad ka long ruh ka jingsngewkhia”
Ka Myntri ka la ong ruh ba ka phang kum ka Ethical Responsibility, ka Mobile-Citizen Journalism bad ka Artificial Intelligence baroh ki dei ki mat kiba donkam ban ïakren bad ïathir jingmut.
“Ka jingkitkhlieh kaba don akor ka dei kaei kaei kaba palat ïa kano kano ka kyndon jong ka riti synshar bad ngi hap ban pynthikna ba ki nongthoh khubor ba dang khie dang san kin ïahap bad ka jingpyrkhat kaba don akor khnang ba ngin ïoh ïa ki khubor kiba lah ban pdiang, kiba sngewtynnad bad ki bym don ka jingshah liang,” ka la ong.
Ka la bynrap ruh ba ki lad pathai khubor ki nang jah suki suki ha ka pateng ba mynta namar ka jingbym lah ban kyrshan ïalade bad ka kamram jong ka Sorkar ka long tang ban wanrah ïa ka aiñ ba la lah ban ïakren ha ka jingïalang jong ki lad pathai khubor.
Ha kane ka lympung la ïashim bynta da ki nongthoh khubor na ki kot khubor bad na ki Electronic bad ki ophisar jong ka tnad Information & Public Relations na kylleng ki bynta jong ka jylla.
