Shillong, Nailar 03: U Nongïalam ka seng National People’s Party (NPP) bad u Symbud Myntri Rangbah ka jylla u Bah Sniawbhalang Dhar u la ong ba ki don bun ngut ki nongïalam jong kiwei pat ki seng saiñ pyrthei kiba don ka jingangnud ban pynïasoh sha ka seng NPP na ka daw ba ki la ïohi ïa ki jingtreikam jong kane ka sorkar Meghalaya Democratic Alliance (MDA).
“Nga tharai ba kin don bun ngut ki nongïalam ki ban sa pynïasoh sha ka seng NPP. Na ka daw ba ki la ïohi ïa ki jingtreikam ba bha jong kane ka sorkar MDA hapoh ka jingïalam jong ka NPP, nga la ïohi ba ki don bun ngut ki nongïalam seng saiñ pyrthei kiba la pynpaw ïa ka jingmon jong ki ban pynïasoh sha ka NPP khlem da buh ïa kino kino ki kyndon,” ong u Bah Dhar haba jubab ïa ka jingkylli ha kaba ïadei bad ka jingwan pynïasoh jong u MLA ka Congress na Mylliem u Bah Ronnie V Lyngdoh sha ka NPP, ha kaba kane ka la pynlong syndon ïa ka Congress ba kan ïoh ïa u nombar zero ha ka ïing kaba don 60 ngut ki MLA.
Haba kylli la ka NPP kan leit ban ïakren bad ki nongmihkhmat ka TMC, u Bah Dhar u la pynneh da kaba ong ba ka NPP kam buh thong tang ïa kawei ka seng saiñ pyrthei hynrei ka plie ïa ka jingkhang ïa baroh kiba kwah ban pynïasoh sha ka seng.
Haba jubab ïa ka jingkylli na ka seng Congress kaba la kynnoh ba ka NPP ka la shu thied ïa ki MLA, u Bah Dhar u la ong ba ka jingkiew jong ka party ka dei hi na ki kam kiba ka la leh ha kaba kane ka la khring ïa kiba bun ki nongïalam ban pynîasoh sha ka seng.
U la ai jingmut ruh ban pyndonkam ïa ka ktien “purchasing” ban batai halor ka jingwan rung ki dkhot ba thymmai, naba kane kan lah ban ktah ïa ki dkhot jong ka ïing kiba la pynïasoh sha ka party.
“Na ka daw ba ki kam ki kren khamjam, ka la pynlong ïa kiba bun ban ïasoh sha ka NPP. Sngewbha wat pyndonkam ïa ka kyntien ba thied ïa ki MLA ne purchasing MLA, naba ki briew kin pynlong kamkai ïa phi. Ka kyntien ba shu thied kam long kaba dei. Ka lah ban khring sha ka defamation case. Ki MLA ki la pynpaw ïa ka jingangnud jong ki ban pynïasoh sha ka NPP hadien ba ki la ïohi ïa ki jingtreikam jong kane ka sorkar,” ong u Symbud Myntri Rangbah.
Ha kaba ïadei bad ka elekshon 2028, u Bah Dhar u la ong ba ka NPP ka la buh ka thong ban jop marwei da kaba angnud ban ïoh kumba 35 ngut tam ki MLA. U la ïathuh ruh ba wat la ka seng kan ïoh ban synshar marwei kan pynneh ïa ka jingïatreilang bad ka United Democratic Party (UDP), bad ki paralok jong ka.
Haba kylli halor ka jinglah ban ïoh shuki myntri u MLA barim ka Congress u Bah Ronnie V Lyngdoh, u Bah Dhar u la ong ba ka shong ha u Myntri Rangbah ka jylla u Conrad Sangma, naba une u MLA u la pynïasoh sha ka NPP khlem da buh kyndon.
