Shillong, Naitung, 18: U Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ha ka sngi Thohdieng u la ong ba ka Sorkar ka dang pyrkhat ba kan khmih bniah bad ban pynkhlaiñ ïa ka Meghalaya Residents Safety and Security Act (MRSSA) lane ban wanrah noh da kawei pat ka aiñ ba thymmai ka ban ïakhun pyrshah ïa ka jingwanrung tuh jong ki mynder na ka ri Bangladesh.
Katkum ka jingong jong u, la donkam da ka aiñ kaba kham khlaiñ ban khanglada ïa ka jingwan rung kyrthep jong ki briew kiba nabar shapoh ka jylla.
Ha ka jingïakren bad ki lad pathai khubor u Bah Tynsong u la ong ba ka Sorkar ka dang bishar bniah ïa ki lad ki lynti ban pynbeit thymmai ïa ka MRSSA kaba la don lypa ne ban thaw da kawei pat aiñ kaba thymmai ban pynbeit ïa ki jingduna bad ban kham pynbha shuh shuh ïa ki lad jingïada.
“Ka Sorkar Jylla ka dang pyrkhat halor kane ka sobjek,” ong u Bah Tynsong.
“Ha nga shimet, nga sngew ba ka long kaba donkam palat bad ngi donkam kyrkieh ban don ïa ka aiñ kaba khlaiñ ha ka jylla,” u la pynpaw bad ong ruh ba ki aiñ bynrap ka Sorkar Pdeng ki kham khlaiñ shuh shuh ban khanglad ïa ka jingrung beaiñ.
Da ka jingjrong kaba 443 kilomitar ka khappud bad ka ri Bangladesh, u Bah Tynsong u la ong ba ka jylla Meghalaya ka ïakynduh ïa ki jingeh kiba khraw ban khanglad na ka jingwan rung tuh, ha kaba ki mynder ri ki ju rung tuh lyngba ki lynti ïaid bapher bapher, kynthup ïa ka Kolkata, Rajasthan, bad Bihar.
Ïa ka MRSSA, la pynlong aiñ ha u snem 2016, da ka jingthmu ban ïada ïa ka jingshngaiñ jong ki nongshong shnong ka jylla Meghalaya da kaba pyrkhing ïa ka rung ka mih jong kiwei pat ki bym dei ki nongshong shnong ka jylla.
Kane ka aiñ ka la ïakynduh mawsiang ban pyntreikam bad ka jingshah pynïap ba dang shen jong uwei u nongjngohkai pyrthei na Madhya Pradesh ka la pynmih biang ïa ki jingdawa ban pynkhlaiñ ïa kane ka aiñ.
Ka Sorkar ka la kam ba donkam ïa ka rukom treikam kaba kham khlaiñ ban ïaleh pyrshah ïa ka jingwan rung tuh bad ban pynthikna ïa ka jingshngaiñ jong ki nongshong shnong bad ki nongwan jngohkai pyrthei.
U Bah Tynsong u la pynpaw ba ïa ki jingkheiñ ba thikna jong ki nongwan rung tuh ym pat lah ban ïoh. Hynrei u la pynthikna ba ka Sorkar ka dang pyrshang ban pynkhlaiñ ban ïada bad ban lap ïa ki jingwan rung tuh ha kaba ki shipai BSF bad ki Pulit ka jylla ki don ka bynta kaba kongsan ban khanglad ïa kine ki jingrung tuh.
