Shillong, Nailur, 01: Uwei u khynnah uba la tip kyrteng kum u heprit Dameshwa Thabah uba dang shu dap 16 snem ka rta ha ka 28 tarik u bnai baladep u la shah rong ha ka Wah Sohiong ha ka por noh phai sngi jong ka Sngi u Blei.
Ïa ka met jong une u khynnah la ïoh sei hapoh 24 kynta da ka kynhun Search and Rescue Team (SRT) bad ka kynhun State Disaster Response Force (SDRF) bad na ka tnat Fire and Emergency Services ha ka noh phai sngi jong ka Lah sngi u Blei.
Hadien ba ka ophis u Block Development Officer (BDO) Sohiong C&RD Blcok ka la pyndep ïa ki jingdonkam baroh katkum ki kyndon aiñ la aiti noh ïa ka met jong u heprit Dameshwa Thabah sha ki bahaiing hasem bad la pynkit noh ïa ka met sha iing.
Ha kane ka sngi la donlang ruh u MLA ka Sohiong Constituency u Bah Synshar Thabah, u MLA barim u Bah Samlin Malngiang, ki nongïalam shnong, ki nongshong shnong kiba la wan sngewlem ïa ka iing kaba la mad ïa kane ka jingjia ba sngewsih.
Katkum ka jingïathuh jong u Sordar ka shnong Sohiong Lenmawtap-A u Bah Diswerroy Syiemlieh ha ka jingïakren bad ki lad pathai khubor shwa ban ïoh sei ïa ka met, u la ïathuh, hadien ba la rang u slap ha ka sngi u Blei u heprit Dameshwa u la sei ïa ka bol kaba u la ïoh kum ka jingai sngewbha sngi kha ban leit ïaleh kai bad ki para khynnah ha phyllaw ka skul kaba don harud ka wah ha ka shnong Sohiong.
U la ïathuh ruh ba hapdeng ka jingïaleh kai, ka bol ka la sied sha wah bad u Dameshwa u la leit mareh ban tam ïa ka bol bad don napdeng jong ki paralok kiba la ong ba ka shitom bha ban ïoh ïa ka bol namarba ka um ka heh bha hynrei imat na ka jingbynnud u heprit Dameshwa u la ïaleh katba lah ban ïoh biang ïa ka bol bad hap ïalade sha wah bad shah rong ha ka um.
Hadien ba ki paralok ki la leit pyntip ïa ka jingjia sha shnong, ki bahaiing bad ki bor pynïaid shnong ki la sdang ban wad ïa u heprit Dameshwa ha ka sngi U Blei hynrei kim shym la lap satia.
“Kumta ngi la hap ban pyrta shnong bad ban wad da ka shnong bad ngi la pyntip ruh sha ki Pulit ka Sohiong Out Post, sha u Block Development Officer (BDO) Sohiong bad sha u MLA ba kin ïarap wad ïa u,” ong u Bah Syiemlieh.
Shwa ban ïoh ïa ka met, lai ngut ki samla na ka shnong Mawkynthei Wahlyngu, Sohiong kata u Karest Kharrngi, u Monson Shabong bad u Weness Thabah ki la pyrshang ban ngam ha ka thwei hynrei namar ka jingjngut palat ka um kim ïohi satia ïa ka met.
La sakhi ruh ba ki paidbah ki la pynshngaiñ lang ïa ka kynhun SDRF, SRT bad ka Fire and Emergency Service kiba wad ïa ka met u heprit Dameshwa.
