Shillong, Jymmang, 26: Ha kawei na ki jingjia ba sngewsih kaba la jia ha ka shnong Lawblei, South West Khasi Hills District uwei u rangbah ïa uba la tip kyrteng kum u Bah Sainkupar Lyngkhoi, 23 snem ka rta katba u dang leit tong doh u la hap kynsan bad ngam jyllop hapoh ka wah Umngi.
Kane ka la jia hynnin ka sngi U Blei ha ka por kumba 6:30 baje haduh 6:45 baje ha kaba une u rangbah u la mih na la iing ha ka por 3:00 baje noh phai sngi ryngkat bad lai ngut ki khynnah kiba ma u u la ïalam lang ban leit tong doh. Hynrei ha ka por kumba 6:45 baje u la ur bad hap hapoh ka wah. Ki khynnah kiba leit lang bad u, kim shym la lah satia ban ai jingïarap namar ka jingkhlaiñ shaba palat ki latlat jong ka wah bad haduh mynta ïa ka met jong une u rangbah ym pat lap satia.
Ha ka step Lah Sngi u Blei, ki Pulit ngam um jong ka kynhun Search and Rescue Team (SRT) na Shillong ryngkat bad ki Pulit jong ka Mawkyrwat Police Station kiba la poi ha ka jaka ba u Bah Sainkupar u la ngam jyllop hynrei kim shym la lah satia ban ïoh sei ïa ka met namar ka jingkhlain shaba palat ki latlat jong ka um bad ba ka jaka ruh ka long kaba kaba dap da ki krem maw.
Ka jaka kaba une u rangbah u la ngam jyllop ka dei kaba la tip kum ka Shar Shar, kaba jngai tang kumba 2 kilometre na surok Mawkyrwat-Shillong.
Ka khubor ba la ïoh lum ka ïathuh ba une u rangbah u dei uba sah ha ka shnong shnong Lawbyrtun, Eastern West Khasi Hill, hynrei u la poi shongkha pat ha ka shnong Lawblei.
U Myntri jong ka shnong Lawblei u Bah Swington Lyngdoh u la ong na ka liang jong ka Dorbar Shnong Lawblei ka la kyntu ïa ki paitbah jong ka shnong bad khamtam ïa ki rawon kiba ju smat ban wan khwai ha wah Umngi ba kin long kiba husiar namarba kane kam dei shuh ka sien kaba nyngkong hynrei ka dei ka jingjia kaba ju jia khah khah jan manla u snem.
