Shillong, Nailur, 08: U Lamphang jong ka Iingdorbar Thawaiñ ka Jylla u Thomas Sangma u la ïathuh ba u la ïoh pdiang ïa ka shithi ba ka Voice of People Party (VPP) ka la sospon ïa u MLA jong ka North Shillong Constituency u Bah Adelbert Nongrum.
“Nga la ïoh pdiang ïa ka shithi (na ka VPP). Ha ka jingshisha u (Bah Adelbert) la shah sospon na ka party hynrei ngam lah ban pdiang namarba ha ka kopi jong ka shithi sospon ba la aiti sha nga la shu thoh beit sha u Adelbert Nongrum, tang kumta hi, Adelbert Nongrum. Ki lah ban don bun ngut ki Adelbert Nongrum ha kata ka shnong,” la ong u Sangma ha ka jingïakren bad ki lad pathai khubor ha ka Lah Sngi u Blei.
“Ban shu ïakren, haoid u dei hi ma u,” u la ong.
Kane ka jingpynshai jong u Lamphang ka long hadien ba u Bah Adelbert Nongrum u la buh jingkylli ha ka sngi sdang ka Dorbar Synrai jong ka Iingdorbar Thawaiñ hadien ba u la shah pynkynriah na ka jaka ba ju shong mynshwa hynrei mynta la pynkynriah shadien.
“Ngan ym ong ba ki kyndon ki bakla, haba u buh jingkylli ïa kane ka mat mynta ka snig ha Ingdorbar thawaiñ khlem da kdew ïa kano kano ka bynta. Nga shu kdew haba u ieng ban kren ïa kane ka kam mynta ka sngi hapoh ka Iingdorbar Thawaiñ kam long katkum ki kyndon. Hynrei nga la khot ïa u sha kamra treikam jong nga ban ïa pynbeit.
“Hynrei ngan sa bishar bniah ïa kane ka kam. Ha ka jingïohi jong nga u dang dei hi u MLA ka VPP namarkata u dei hi ruh ban shong lang bad ki MLA ka VPP. Ka jingpynkynriah ïa ka jaka shong jong u ka dei ka jingleh jong ka Secretariat jong ngi. Ngi hap ban pynbeit ïa kane. Nga ngeit ba un sa ïoh shong biang ha ka jaka ba u ju shong,” la ong u Sangma.
“U (Bah Adelbert Nongrum) la shah sospon bad ïa kata ruh la pyntip sha ngi katba ha ka shithi ba la sospon ym shym la kdew ba u dei u MLA. La shu sospon ïa u tang na ka party ym kum u MLA jong ka party. Kata ka dei kaba ngi lah ban batai namarba ïa ka shithi sospon la shu thoh beit tang Mr Adelbert Nongrum, Jaïaw.,” la ong shuh shuh u Lamphang.
