Shillong, Naitung, 15: U Myntri ka tnat Bording ka Sorkar Jylla u Abu Taher Mondal u la kular ba un sa khmih bniah ïa ka jingkiew palat ka bai thang bording hadien ba la pyndait ïa ki Smart Meter.
U Myntri u la pynpaw ïa kane hadien ka jingïakynduh ïa ki nongïalam ka KSU, kiba la pynsngew halor ka jingkiew ka bai thang bording ha ïingsah ki baduk ba la tip kum ka BSUP Housing Complex kaba don ha Nongmensong, Shillong.
U Mondal u la ong ba un sa phah tohkit ïa kane ka kam da kaba pyndait ar tylli ki Meter markhap khnang ban dup lah ban ïanujor ïa ka jingïapher ha ka rukom phah siew ïa ka bai thang bording.
“Ïa u Smart Meter la bthah da ka Ministry of Power bad baroh ki jylla ki pyntreikam ïa ki Smart Meter bad katkum kane ngi hap ban pyntreikam ïa ki Smart Meter. Ka jingkylli kaba mih na ka jingkiew palat ka bai thang bording yn sa khmih bniah bad lada donkam ngi lah ban don ar tylli ki meter marjan ban peit thikna kumno ka jingpher ka wan. Kumta ïa kane ka mat yn sa peit bniah,” la ong u Mondal ha ka jingïakren bad ki lad pathai khubor ha ka sngi Baar.
U la ban jur ba la pyntreikam ïa ki Smart Meter ha kylleng ka ri ban weng ïa ki jingeh kum ka jingsiew bakla, ka jingkhñiot shaba palat ïa ka jingsiew bad ka jingpynslem ban siew.
“Baroh kine ki mat la shimkhia da ki Smart Meter. Ka ïarap ïa ka rukom sam bording bad dei na kata ka daw ba ym tang ha Meghalaya hynrei ha ka ri baroh kawei la bthah ban leh ïa kane mynta,” la ong u Mondal.
U Myntri u la pynthikna ba ïa kane ka kam yn sa ïa kren bad u Chairman & Managing Director (CMD) ka Meghalaya Energy Corporation Limited (MeECL) ynda ki la wanphai na Delhi, bad yn sa pyrshang ban pynbeit ïa kane ka jingeh hapoh ka taiew ban wan.
“Mynta ka taiew, ngan sa leit ïashim bynta ha ka jingïalang jong ka North Eastern Regional Power Committee (NERPC). La kumno kumno ngin sa pyrshang ban weng ïa kane ka jingeh ha ka taiew ban sa wan,” u la bynrap.
Shuh shuh, u Myntri u la kdew ba ïa ki Smart Meter yn sa pyndait ha baroh kawei ka jylla, kaba kynthup lut ïa baroh ki nongthang bording.
“La pyndait ïa ki Smart Meter ha kiba bun ki jaka ym tang ha Nongmensong. Hangno hangno ruh ba don ka jingring bording hangta manla ka jaka yn buh ïa ki Smart Meter. Ngim lah ban leh lut ïa 6 lak ngut ki nongpyndonkam bording ha ka shisngi ne arsngi. Yn leh manla ki wat ha manla ki jaka,” u la ong.
