Shillong, Lber, 05: U Myntri Rangbah ka Jylla Conrad K Sangma ha ka sngi Balang u la kular ba un sa pynsngew sha ki tyndong skhor jong ka Sorkar Pdeng ban pynïasoh ïa ka lynti Rel sha Baghmara, South Garo Hills.
“Haoid ngan sa pynsngew ïa kane ka jingkyrpad sha ka Ministry bad ngin sa ïathir sani bha lehse ha ka kyrdan Myntri ka ban sa jia long noh shen,” la ong u Sangma ha ka jingïakren bad ki lad pathai khubor haba kdew ïa ka dorkhas ba la aiti da ki lai ngut ki MLA na South Garo Hills District.
U Sangma ula ong ba ka Sorkar kan sa ïakren shwa bad ki paidbah shwa ban shim rai halor kane ka kam.
“Ngi la pynpaw shai ba ngin ïakren shwa bad ki paidbah, ngin sa peit haduh katno ki paidbah ki sngew bad kaei ka jingpyrkhat jong ki halor kane ka jingai jingmut bad lada ngin ïoh ïa ka jingmynjur na ki paidbah ngin sa lah ban ïaid shakhmat namarba kane ka kam kan long ka jingmyntoi jong ka thaiñ bad kumjuh ruh kan kyntiew ïa ka ïoh ka kot jong ka thaiñ bad kan ïarap ruh ïa ki nongrep bad ïa ki nongkhaii kiba don ha ka thaiñ,” u la bynrap.
