Shillong, Rymphang, 16: Lai ngut ki snar nongtuh ki la shah kem ha ki Pulit ka Sadar Police Station ha ka sngi Saitjaiñ katba ki dang pyrshang ban rongtuh ïa kawei ka Scooty kaba don ïa u nombar MLO5 AC 8352 da kaba ot bad bteng ïa u waïar ban pynim ïa ka thuk thuk.
Ki Pulit ka Sadar Police Station ki la ïohkem ïa kine ki lai ngut ki snar nongtuh ha ka por 4:50 baje mynstep katba ki dang ïaid paraha ha kylleng ka nongbah Shillong, la pyntip u kyrwoh ba la phah da u Superintendent of Police ka East Khasi Hills u Bah Vivek Syiem ha ka sngi U Blei.
U SP u la pyntip ba kine ki lai ngut kiba la shah kem ki long u Ribellang Phyllei, 25 snem ka rta na ka shnong Biar, Laskeiñ Block, West Jaiñtia Hills District uba ñiah ïa ka kali Swift katba arngut kiwei pat ki la lait phet da kaba shim kabu ïa ka jingdum katba kiba dang thmu ban phet sha West Jaiñtia Hills.
Ki Pulit kiba ap pahara ha Checkpoint ha Mawryngkneng ki la ïohbat ïa kine ki arngut kiba la tip kyrteng kum u Empyrkhat Dhar, 21 uba sah ha Saphai West Jaiñtia Hills District bad u Steven Syngkon, 19 snem uba sah ha Ïaw Thymme West Jaiñtia Hills District.
Na kine ki lai ngut ki Pulit ki la ïoh kurup ar tylli ki Helmet, ar bilor plastik ba dap da ka petrol, ar song ki Screw Driver, kawei ka song ba la thep ïa ki Spanner ba don la ki jong ki jong ki jingheh, uwei u Allen Wrench, uwei u T- Hand Hex key, uwei u T- Handle Torx Key, T. 6100 hajar ka pisa bad lai tylli ki mobile phone.
Ïa ka case la register ha Sadar Police Station hapoh ka Section 305(b)/324(4)/111(2)(b)/3(5) jong ka BNS.
Ki Pulit ki dang pynlong ïa ka jingtohkti ban tip bniah la kine ki lai ngut ki dei neem kiba donkti ha kaba rong tuh ïa ki thuk thuk ar shaka kiba la shah tuh na kylleng ki jaka.
