Shillong, Naitung 02: Ki Pulit jong ka Mendipathar Police Station ki la iohkem ia lai ngut ki snar nonglute na ka jylla Assam kiba donkti ban lute pisa da kaba pynap suloi ia ki riewpaidbah ha North Garo Hills District bad kane ka kynhun ka dei kaba ju donkti ban leh ruh ia ki kam pyntriem ha khappud jong ka jylla Meghalaya bad Assam.
Kine ki lai ngut ki snar nonglute kiba la don mynta ha ka kti jong ki Pulit ki dei kiba la tip kyrteng kum u Sunil Boro bad u Sahadev Basumatary, katba u Turti Basumatary u dei uba la leit ban pyndem hi hakhmat jong ki Pulit da kaba aiti ruh bad kawei ka pistol lem bad ar tylli ki kuli ki bym pat pynbthei.
Ki Pulit mynta ki dang pynlong ia ka jingthwet kaba jur ban iohkem sa ia u Kaltu Rabha uba donkti lang ha kane ka kam lute.
Ha u kyrwoh ba la phah da u Superintendent of Police jong ka North Garo Hills, u Pawar Swapnil Vasantrao, la iathuh ba ha ka janmiet 18 tarik Jylliew 2024 saw ngut ki runar ki bym lah ban ithuh durkhhmat kiba shong da ka Aprilia Scooty kaba don ia u nombar AS18J-0181 bad ka Bajaj Pulsar 220 (black) kaba don ia u nombar AS18 E-7925 ki la lute pisa 80 hajar na ki riewpaidbah bad ioh khung ruh ar tylli ki mobile phone bad ki simcard.
Ha kane hi ka janmiet ki nongshong shnong jong ka Beldongpara, Goalpara, Assam ki la ioh bat ia ka Scooty Apprillia bad ia ka thuk thuk Pulsar 220 (black) kaba don ia u nombar AS 18 E 7925 ha ka shnong Beldonpara hynrei, ki snar nonglute ki la lait phet da ka said na ki paidbah.
Ha ka 19 tarik, Jylliew, 2024 ki lanot kiba kylla sohpdung ha ka kti ki nonglute ki la mudui da ka ejahar ha ki Pulit ia kaba la register case ha Mendipathar Police Station hapoh ka Section 392 Indian Penal Code (IPC) bad ka Sec. 25 (IA) (IB) Arms Act.
Tang shu ioh pdiang ia kane ka ujor, ki Pulit hapoh ka jingialam jong u DSP, Special Operation jong ka North Garo Hills District Executive Force ki la khynra ia kawei ka jaka riehtngen ha khappud jong ka jylla Assam ha ka 24 tarik, Jylliew, 2024 ha kaba ki la iohkem ia u Sunil Boro, 33 snem ka rta uba shong basah ha shnong Upper Borgum, Goalpara District, Assam bad kurup ruh ia ka Scooty kaba don ia u nombar ASI8J-0181 kaba u la pyndonkam ban leit lute bad kiwei pat ki paralok ba la tip kyrteng kum u Kaltu Rabha, u Turti Basumatary bad Sahadev Basumatary ki la lait phet da ka said na ka kti jong ki Pulit.
Ha ka 1 tarik, Naitung, 2024 u Turti Basumatary, uba sah ha ka shnong Buglamari, Goalpara District, Assam u la leit ban pyndem hi dalade hakhmat jong ki Pulit ka North Garo Hills Police ryngkat bad kawei ka pistol lem bad ar tylli ki kuli ki bym pat pynbthei.
Da ka jingialam lynti jong u Turti Basumatary ki Pulit ki la iohkem sa ia u Sahadev Basumatary na ka shnong Tikrikilla, West Garo Hills.
Ki Pulit mynta ki dang pynlong ka jingthwet kaba jur ban iohkem sa ia u Kaltu Rabha uba dang don mynta ha ka jingphetrieh.
