Shillong, Nohprah, 6: Ka Khasi Students’ Union (KSU) ha ka sngi Balang ka la dawa ia ki bor pyniaid jong ka North Eastern Indira Gandhi Regional Institute of Health and Medical Sciences (NEIGRIHMS) ban ailad ia ki samla trai ri trai muluk ba kin thoh ia ka eksamin ha la ka jong ka jylla.
Ka KSU ba la lamkhmat da u General Secretary u Samla Donald V. Thabah ka la aiti da ka dorkhas ha u Director ka NEIGRIHMS u Prof (Dr.) Nalin Mehta ban pynpaw ia ka jingsngewkhia halor ka jingthungkam ha ka post Group-B bad Group-C.
Ha ka shithi, ka Union ka la pynpaw ba ka lap ba bun na ki nongthep kam kiba dei ki trai jylla jong ka jylla Meghalaya kiba aplai ia ki post ha ka Group B bad C la bthah ba kin leit thoh eksamin sha ki Centre kiba don shabar ka jylla.
“Kane la pyndiaw bha haduh katta katta ia ki samla namarba ki jaka thok eksamin la leh khnang da kaba phah sha bar jylla khnang ban pynduhlad ia ki bad ban ailad ia kiwei pat ki bym dei ki riewlum ban ioh rung ha kine ki kam,” ong u General Secretary ka KSU.
“Ka Union ka lap ba ki nongaplai kam na Meghalaya ki hap ban leit thoh eksamin shabar ka jylla na ka bynta ki kam ba la thep katba ki kam ki dei kiba hap ban trei ha la ka jong ka jylla bad kane kam dei satia ka sien kaba nyngkong bad kane ka la jia la bunsien bad ka Seng kan ym ailad satia ba kum kine ki jingjia kin dang jia biang hadien habud,” u la ong.
U la ong ruh ba ka Union ka la kyrpad ia ki bor badei peit ba ki dei ban sngewthuh ba bun na ki nongaplai kam na kane ka jylla ki dei kiba wan na ki longing kiba kham duna ka ioh ka kot bad kam long satia kaba suk ia ki ban leit sha kiwei pat ki jylla tang ban thoh ia ka eksamin bad kane ka long kumba pynduh ia ka hok ka jong ki.
Shuh shuh u la ong ba ka Seng ka la dawa ia ki bor pyniaid ka NEIGRIHMS ban ailad shwa ia ki trai jylla ha kane ka jingthungkam.
