Shillong, March 30: Ki shipai BSF jong ka 172 Battalion kiba la ïoh jingtip na ki tnat syntiat, ha ka sngi Saitjaiñ, ha ka jingpynap shrip ki la ïohkem ïa uwei u mynder Bangladeshi uba la tip kyrteng kum u Shamsuddin, na ka shnong Sonatan Punji, Sylhet District, Bangladesh katba u dang pyrshang ban jam be-aiñ sha u pud u sam jong ka ri India lyngba ka khappud jong ka East Jaiñtia Hills District, Meghalaya.
Ïa une u mynder Bangladeshi la aiti noh sha ki Pulit ban leh ïa kaba donkam katkum ka aiñ.
Ka kynhun ki shipai BSF na ka 110 Battalion, ha ka sngi Saitjaiñ ki la pynpulom ïa ka jingthmu jong ki saw ngut ki nong India ban khaii tuh ïa ki masi sha ka ri Bangladesh.
Ha ka jingtalasi, ki shipai BSF ki la ïoh bat ïa ki saw ngut ki nong India ryngkat bad lai tylli ki kali ba la thep ïa ki 13 tylli ki masi katba ki dang ïaid sha khappud jong ka East Khasi Hills District.
Ha ka jingtohkit, kine ki saw ngut kim shym la lah satia ban ai ïa ka jubab kaba shai halor ka jingkit ïa kine ki masi. Hadien kane, ïa kine ki saw ngut, kynthup ïa ki lai tylli bad ïa ki 13 tylli ki masi la aiti noh sha ki Pulit ban leh ïa kaba donkam katkum ki kyndon jong ka aiñ.
