Shillong, Rymphang 22: Ka Village Defence Party (VDP) Umphyrnai ha ka step phyrngap jong ka sngi Thohdieng 21.02.25 ki la ïoh ban kem ïa uwei u nongtuh narlyngkhot ba la pynïeng da ka PWD (Roads) ha shilynter ki arliang surok naduh Mawblei shaduh Puriang ïa kiba la tip kum ki Road Delineanators, uba shongdor kumba Rs.2426/- uwei.
Une u briew ba la shah kem dei uba kyrteng u Bah Stanly Dkhar uba kam ïalade ba u shong u sahwai ha Mawarling, Laitkor.
Ki dkhot jong ka VDP ki la ïoh ban kem ïa utei u briew ha ka por ba u dang jynrat ïa kitei ki nar ha ki thaiñ Umphyrnai-Laitkor bad thep ha ka kali kaba u la pynap lypa. Hynrei kaba kham lyngngoh ka long, ba kata ka Kali ka dei ka Ambulance kaba khlem don number plate eiei. Ka jingïoh kem ka long ha ka por 4:00 baje mynstep katba ki dkhot jong ka VDP Umphyrnai ki dang ïa ïaid pahara patrolling. Uwei u dkhot u bym kwah ban pynpaw kyrteng ïalade, u ïathuh namar ba kynrei than eh ki kam sniew kam tuh kam thiem hapoh ka Shnong bad ki Dong, ki la trei tyngeh hadien ba ki la ïoh jingujor ba ki jah ki narlyngkhot, ki signboard bad ki guard railing jong ka PWD.
Hadien ba ki VDP ki la ai jingsneng tyngeh, ki sa leit ban aiti noh sha ki pulit jong ka Thanad Madanrting Police Station ban leh ïa kaba donkam.
Hashwa jong katei ka jingjia, la ïoh jingtip ba na ka liang jong ka tnad PWD ki la shait ujor FIR sha ki pulit halor ka jingjahrngai jong ki signboard bad kiwei pat ki road furniture jong ka, hynrei ym juh ïoh kem satia, imat dei na kata ka daw ba ki sa shlur than eh ki nongtuh.
Ka VDP Umphyrnai ka maham tyngeh ba kan nym mab ïano ïano kiba leh ïa ki kam sniew hapoh ka shnong bad ka thaiñ jong ka.
