Shillong, Naiwieng 17: Ki nongtrei Accredited Social Health Activist (ASHA) ha ka sngi Thohdieng ki la mih sha surok ban pynlong da ka jingïaid rally kaba jai jai kum ka jingpyrshah ïa ka jingkuman jong ka Sorkar Jylla halor ki jingdawa ba kynthup ruh ïa ka jingpynkiew ïa ka jingsiew bainong.
Wat hapdeng ka jingther jong u slap, da ki spah ngut ki nongtrei ASHA ki la ïashim bynta ha kane ka jingïaid paidbah kaba la pynkut ha madan Malki.
Ka President jong ka Meghalaya ASHA Workers’ Union (MAWU) Kong Marajune Myrsing haba kren ha ka jingïalang ka la ong ba kan ym don kano kano ka jingpyndem lada ka Sorkar kam lah ban ai ïa ka jingkular ba la dawa da ki ASHA.
Ki nongtrei ASHA ki la dawa ïa ka Sorkar Jylla ban pynkiew ïa ka jingsiew Honorarium na ka T. 2,000 sha ka T. 5,000
Haba pynpaw ba ki ASHA ki don ka hok ban dawa, ka Kong Myrsing ka la ong, “ka Myntri ka Koit ka Khiah ka la pyndep ba ka bainong jong ki nongtrei ASHA ka long T. 5,000 hynrei ka tip ba ka Sorkar Jylla ka siew ïa ngi tang T. 2,000 kaba long tang T. 66 shi sngi.
“Ngan pynkynmaw ruh ïa ka Myntri ka Koit ka Khiah ba ka Sorkar Jylla ka la siew ïa ngi da ka fxed honorarium kaba T. 2,000 hadien ba ka la pynduh noh ïa ka ABF/MBBS, ïa kaba ym shym la pynkhuid satia mynta la bun bun snem,” ka la bynrap.
Shuh shuh ka kong Myrsing ka la ong ba ka Union kan sa shong jingïalang lashai ka sngi ban shim rai biang kumno ban pynlong ïa ki jingïakhih ha ki sngi ban dang wan.
“Nga pynbna ba ïa ki peace rally ba la pynlong ha ki District la pynkut mynta ka sngi bad nangne shakhmat kan ym long shuh da ka peace rally hynrei da ka protest rally. Nga kyntu ïa ki dkhot jong ka Executive Committee ba kin ïashim bynta lang ha ka jingïalang ka ban long lashai ka sngi na ka bynta ban rai ïa ki jingïakhih,” ka la ong.
Ka jingshakri ha ka koit ka khiah ha ki 7,000 tyllli ki shnong ka la shah ktah na ka daw ka jingpynlong jong ki ASHA ïa ka jingïakhih kaba khlem pud sngi kaba la kynjoh mynta sha ka sngi kaba shiphew.
Ha ka 15 tarik mynta u bnai, ka Myntri ka Koit ka Khiah ka Dr. Ampareen Lyngdoh ka la pyni ïa ka Official Data halor ka jingsiew bainong ba la ai ïa ki nongtrei ASHA bad katkum kane ka Data ka pynpaw ba ka nongtrei ASHA na ka Kyrdem PHC ka la ïoh T. 82,000 kum ka “performance incentives” bad ka “regular honorarium” na ka bynta hynriew bnai.
Katkum ka Official Data, bun na ki nongtrei ASHA ki la ïoh ïa jingsiew kaba long naduh T. 23,000 haduh T. 82,000 ha ki hynriew bnai kata naduh ka 1 tarik Ïaiong, haduh ka 30 tarik, Nailur 2023 katkum ka tarik ba la siew sha ki Bank Account.
Ka Dr. Ampareen ka la ong ba ka kyndit ban ïohi ba ki nongtrei mon sngewbha ki ïoh ïa ka jingsiew kaba heh.
