Shillong, Risaw, 21: U General Secretary ka Khasi Students Union (KSU) u samla Donald V. Thabah u la ong ba ka seng ka pdiang sngewbha ïa ka jingpyntreikam jong ka Sorkar Jylla ïa ka Meghalaya Residents Safety and Security Act (MRSSA), 2016 watla ka jingpyntreikam ïa kane ka aiñ ka la shim por haduh phra snem duna.
“Ha ka jingshisha ka jingpyntreikam ïa kane ka aiñ ka la sahteng namarba la mynjur ïa ka aiñ naduh u snem 2016. Wat ka khyrdop talasi ha Umling ka lah don hynrei kam pat treikam haduh mynta,” la ong u samla Donald Thabah ha ka jingïakren bad ki lad pathai khubor ha ka lah sngi u Blei.
“Kaba kongsan eh ha ka Meghalaya Residents Safety and Security Act (MRSSA), 2016 ka dei ka jingthaw ïa ki District Task Force bad ka jingpynieng ïa ki Entry Point bad ki Exit Point,” u la ong.
Halor ka jingmang pisa kaba mar 2 lak ïa ki District Task Force, u General Secretary ka KSU u la ong, “ha ka jingsngewthuh jong ngi, ka jingmang pisa kaba mar 2 lak kawei ka district ngi ïohi ba ka dang dei tang ka Pilot Project bad kam pat lah ban treikam pura. Ngi kyntu ïa ka Sorkar Jylla ban shimkhia da kaba thaw ïa ki komiti bapher bapher hapoh ki District Task Force.”
“Ha ki snem kiba mynshwa, ka Sorkar ka la bynshet ha ki 6 tylli ki dorbar shnong ha nongbah Shillong bad ngi kwah ba ka sorkar kan bynshet ha baroh ki dorbar shnong bad ban peit ruh ba ha ki district ba kham bun ka jingrung jingmih jong ki briew khlem da ïohi,” ula ong.
“Ngi kwah ba ka Sorkar kan da pyrkhing bha bad ïa ka Entry bad Exit Point dei ban pyntrei noh shaid shaid khnang ba ngin dup lah ban pynurlong ïa ka jingangnud ym tang jong ka KSU bad kiwei ki sengbhalang hynrei jong u paidbah nongshong shnong,” la bynrap u samla Donald Thabah.
“Kum ka jaidbynriew kaba ritpaid haduh katta katta, ngi ju ïohi hi na ka por sha ka por ba ki briew kiba nabar ki ïaleh ban wan rung sha kane ka jylla jong ngi kumno ban wad ïa ki lad kamai jakpoh, ban buhai shnong bad ban ïoh ïa ki jaka ki puta,” la pynpaw une u nongïalam ka KSU.
U la pynpaw ruh Katba ka Jylla Meghalaya ka dang ap ïa ka Sorkar Pdeng kaba dang eksamin shi eksamin ïa ka jingdawa Inner Line Permit (ILP) kaba la dei ka jingdawa jong ka KSU naduh u snem 1987 ka KSU ka kyntu ïa ka Sorkar ban pynstet noh mardor ban pyntreikam ïa ka MRSSA, 2016.
“Katba ngi dang bunkam ha ki jingïakren bapher bapher bad ka Sorkar, ngim lah ban len ba ki briew kiba nabar ki dang rung shi rung. Nalor ki don ki briew kiba la ïoh ïa ki kot ki sla, ki don sa ki briew kiba sah slem (hapoh ka jylla) khlem ki kot ki sla kiba biang. Ka jingdon jong ki, ka buh jingma ïa ki trai ri trai muluk namarba ngim tip kine ki briew kiba wan rung shapoh ka jylla ki dei kiba kumno,” u la ong.
Haba pynpaw ba ka jingjur ka jingrung laitluid jong ki briew kiba nabar shapoh ka jylla, u samla Donald Thabah u la ong, “kine ki briew khlem pep shisien ka sngi kin ïaleh ban ïoh ïa ki kot ki slap bad kane ka pynkiew ïa ka jingbun briew hapoh ka jylla ha kaba (ma ngi ki trai jylla) ngi lah ban kylla ban kylla rit paid. Wat ha ka khaii ka pateng la bun ba bat da ki briew kiba nabar, wat ïa ki jaka ki puta ruh ki la ïohbat, ka lah ban jia ha kawei ka sngi ba wat ïa ka synshar ka khaddar ruh khlempep kin sa ïoh bat (lada ym lah ban peitngor bad ban tehlakam.”
Ha kaba ïadei bad ka jingïai buddien jong ka KSU ïa ka jingdawa Inner Line Permit, u samla Donald Thabah u la ïathuh ba ka seng ka ladep ban aiti ïa ka dorkhas sha u Myntri Rangbahduh ka ri u Narendra Modi bad ha u Myntri ka tnat Kam Pohiing bad kumjuh ruh dang ha u bnai baladep, ka seng ka la aiti ïa ka dorkhas ha u Lat ba thymmai ka jylla u CH Chandrashekhar.
“Watla u Lat um shym la ai kano kano ka jingkular, u la pynpaw ba u sngewthuh bha ïa ka jingeh bad un sa pynsngew ïa kane ka jingdawa sha ki tyndong shkor jong ka Sorkar Pdeng ha Delhi namarba ka dei ka jingdawa kaba la kyrkieh,” la ïathuh u samla Donald Thabah.
“Lada ka Sorkar India ka lah ban ai ïa ka ILP ïa ka Jylla Manipur ha u snem 2019 kan eh aiu ban ai ïa ngi ruh namarba ngi la mad ïa ka jingjur shaba palat ka jingrung kyrthep jong ki briew kiba nabar kaba pynthud ïa ka shongsuk shongsaiñ ka la donkam shisha ïa ka ILP ba kan ïada ïa ngi,” la bynrap shuh shuh u samla Donald Thabah.
U la ïathuh ba ka seng kan dang tynruh ban dawa ïa ka ILP la ka long da ki jingïakhih, da ka jingaiti ïa ki dorkhas bad ha kaba ïadei bad ka MRSSA ka seng kan peit shwa kaei ka sienjam kaba ar ba ka Sorkar kan shim.
