Shillong, Nohprah, 10: U Bah Diwell Dhar uba dei u kpa jong ka samla Stephanie Shadap u la dawa ïa ka Sorkar Jylla bad ïa ki bor jong ka aiñ ba kin pynshitom katkum ki kyndon jong ka aiñ ïa u Parmen M. Sangma u Security Guard ba la shah wengkam ha ka Ranger Security Organisation (RSSO) uba donkti ban tynrah da ka kali ïa ka samla Stephanie Shadap bad ïa ka samla Daritngen Podukhei ha phyllaw ka skulbah NEHU ha ka janmiet 17 tarik, Naiwieng, 2025.
Kum ban shu pynkynmaw hangne, ka samla Daritngen bad ka samla Stephanie kiba dei ki samla kiba dang pule ïa M.Sc ha ka Department of Chemistry ka skulbah NEHU ki la ngat ha kane ka jingjia katba ki dang ïaid lynti ha phyllaw ka skulbah NEHU hajan Gate-2.
Ïa kine ki arngut ki samla pule la kit noh mar mar sha Shillong Civil Hospital bad kham hadien la pynkynriah noh sha ICU jong ka Nazareth Hospital namarba la jur shaba palat ka jingmynsaw.
U Bah Diwell Dhar u la pynpaw ruh ka jingsngewnguh ïa ki doktor ka Nazareth Hospital, ïa ka Sorkar Jylla kaba la bei lut nadong shadong ka bai sumar, ïa ki nonghikai bad ïa ki samla pule ka skulbah NEHU bad ïa baroh ki kynhun kiba la don bynta ban ai jingkyrshan ïa ka iing ha ki lai taiew ba la leit noh.
