Shillong, Naiwieng, 28: Ki trai petrol pump ki la ai ka jingkyrshan ïa ka tnat Pulit ba kin kem naphang ïa ki nongtuh bad ïa ki katto katne ki nongñiah trok kiba donkti ban sei be-aiñ ïa ka umphniang petrol na ki trok kit umphniang ha shiteng lynti shwa ban pynpoi sha ki Petrol Pump bapher bapher jong ka Jylla Meghalaya.
U President jong ka Petroleum Dealers Association of Meghalaya (PDAM) Bah Kennedy C. Khryiem ha ka jingïakren bad ki lad pathai khubor ha ka sngi baar u la ong, “namarba ka Meghalaya kam don ïa ka umphniang petrol na lade, namarkata la wanrah na Assam bad ki trok kit umphniang ki ïaid na Jorabad bad ynda la poi ha Lad Umroi, ki don kiba leit sha Jowai bad shaduh Silchar. Hynrei ha shiteng lynti, ki don ki jaka ba ïa ka umphniang ba don ha ki kali la tuh noh.”
“Ngam ong ïa baroh ki nongñiah kali hynrei hynrei katto katne ki nongñiah jong ki trok kit umphniang,” u la ong bad bynrap, ‘na kawei ka Tanker kaba 20 hajar litar ka umphniang ka dang jah haduh 200 litar tam, ka Tanker kaba 12 hajar litar ka petrol ka jah 60 haduh 100 litar. Kane ka dei ka jingduh kaba khraw ïa ngi kum ki trai petrol pump. Ki don ruh ki jingïakhleh ïa ka umphniang.”
U la ïathuh ba ki Pulit Meghalaya ha ka 24 tarik mynta u bnai ki la kyndang ïa ki jaka tuh umphniang bad ki la ïoh kem ruh markhmat ïa kiba donkti bad kurup ruh ïa ki top buh umphniang, ïa ki kot ki sla bad kurup ruh ïa ki trok kit umphniang.
“Kum ki Dealers ka Jylla, ngi ai ka jingïasnohkti ïa ka Sorkar bad ïa ka tnat Pulit kiba la kyndang ïa kane ka jingïatuh ïathiem ha shiteng lynti na kine ki kali kit umphniang petrol. Katkum ka aiñ ym lah ban buh pathar ha kano kano ka jaka namarba ka umphniang petrol ka dei kaba lah ban buh jingmynsaw. Kane ka la dei lypa ka kam be-aiñ,” u la ong.
Haba kynthoh ïa ka jingkynnoh jong ka North East Petroleum Mazdoor Union (NEPMU), u Bah Kennedy u la ong, “haba peit ïa ka jingthoh ba ki ujor ba ka don ka jingleh tohmet, shah leh bein (jong ki nongñiah trok kit umphniang petrol) bad lada ka don kum kata na ka liang jong ngi, ngim kyrshan hynrei lada kum kata kam don bad kaei kaba ngi ïohi ka long beit ba ki Pulit ki lap, ki kurup bad ki don ruh ki video clip kaba ki Pulit ki la ring ha kaba ki la kyndang ïa ki jaka buh petrol be-aiñ.”
U la ong ruh ba ka Association kam kdew kti ïano ïano ruh hynrei tangba ka kyrshan ba ka aiñ kan pynshitom ïa kiba donkti.
Shuh shuh u la ong ba ki paidbah kim dei ban khih jingmut namarba ka umphniang petrol ka dap pura na ka bynta ka jylla baroh kawei.
Ka NEPMU ka la pynbna ban sangeh noh ka jingpynpoi ïa ka petrol sha Meghalaya naduh 29 tarik mynta u bnai da kaba kynnoh ba ki Pulit ka Meghalaya ki leh donbor ha surokbah ka Ri-bhoi District.
Halor kane, ka sorkar kan pynlong ïa ka jingïalang ha Ribhoi hapdeng ka tnat Pulit, ka tnat Food and Civil Supply ka Sorkar Jylla, ki bor synshar district bad ka Mazdoor Union.
