Shillong, Naitung, 02: U Symbud Myntri Rangbah ka jylla uba khmih ïa ka tnat Pynroi Sor Bah Sniawbhalang Dhar u la ong ba ka Sorkar kam shym la beh ïa ki nongdie madan hynrei ka la ai ïa ki da kiwei pat ki jaka, kum ka MUDA complex, kaba biang bha na ka bynta ka kamai kajih.
Katkum ka jingong jong u Bah Dhar, ïa kane ka pynkynriah ïa ki nongdie madan la leh katkum ka hukum jong ka Iingbishar bad la thmu ban buh ruh ïa ki nongdie mdan ha ki jaka ba la mang kyrpang.
Ka jingthmu ban pynkynriah ïa ki nongdie madan ka long ban ai jingmyntoi ïa ki bad ban pynlong ruh ïa ka sor kaba khuid bad suba.
Ha ka jingïakren bad ki lad pathai khubor u Bah Dhar u la ong, “ka Sorkar kan leh ïa la ka jong ka kamram. Ngi la leh ïa ka kam bad ngi la phah ruh ïa ki briew jong ngi namarba ngi kwah ban leh ïa kaba bha tam. Kane ka long katkum ka hukum jong ka iingbishar.”
“Nalor kata, baroh ngi kwah ba ka Sor jong ngi ka dei ban long kaba khuid bad kaba suba. Ha,oid, ngi hap ban burom ïa ki nongïaid nongieng bad kiwei kiba pyndonkam ïa ka surok,” u la bynrap.
U Symbud Myntri Rangbah u la ïathuh ba ka Sorkar ka la ïakynduh ïa ki nongdie madan bad shimkhia ïa ki jingkyrpad jong ki, kynthup ïa ka jingkwah jong ki ïa ki jaka kiba lah ban kamai.
“Kum ka sorkar, ngi la pyrshang ban leh ha kata ka rukom ba ngim ym bret ïa ki briew lajong. Ngi ai da ka jaka kaba bha ïa ki ha ka MUDA complex, kaba bha na ka bynta ka kamai kajih. Ki la kyrpad ïa ngi ba ngin ym buh ïa ki ha ka jaka kaba ym don kamai. Ngi la pdiang ïa kata bad ngi leh katkum ka jingkwah jong ki,” u la ong.
U Bah Dhar u la pynpaw ka jingshaniah ba ki nongdie madan kin ïatreilang bad ka Sorkar bad kin kynriah noh sha ki jaka ba la mang kyrpang haduh ka 22 tarik mynta u bnai kumba la buh. Hynrei u la maham ba lada kim lah ban kohnguh, ka aiñ kan leh la ka jong ka kamram.
“Nga ngeit skhem ba kin ïatreilang bad ka Sorkar bad lymda kumta, ka aiñ kan sa leh la ka jong ka kamram,” u la pynpaw katba da kaba pynskhem ba ka Sorkar ka la kut jingmut ban bud ïa ka hukum jong ka Iingbishar
Haba ïadei bad ki nongdie madan bym don Certificate of Vending, u Bah Dhar u la ong ba ka Sorkar kan sa tuklar ïa kane ka jingeh ha ka por kaba biang.
U Symbud Myntri Rangabh u la ïathuh ruh ba ka jingïakren bad ki nongdie madan ka dang ïaid shakhmat bad ki long kiba laitluid ban ïakynduh ïa ki heh Sorkar ne ïa u ban pynpaw ïa ki jingeh jong ki.
“Ngim (sorkar) long kiba kyllut. Ki (ki nongdie madan) ki laitluid ban ïakynduh ïa ki Ophisar jong nga bad wat ma ki ruh ki lah ban ïakynduh ïa nga na ka por sha ka por. Ka jingïakren ka don beit. Kumba ka long mynta, ka jingpyntreikam ka la wan (hadien ka jingïakren). Ha ka jingshisha, halor ka jingkyrpad jong ki nongdie madan, ngi la pynsangeh noh ïa ka mala ba shapoh jong ka MUDA bad ngi la pynmih da ka jingpynbna ha ka mala ba nyngkong kum ka Vending Zone,” u la ong.
U la ïaiban ruh ba ka rai jong ka Sorkar ka thmu ban ai jingmyntoi hi ïa ki bad ban pynneh ïa ka jingkhuid jingsuba jong ka sor, bad u la pynthikna ruh ym ban shu bret ïa ki nongdie madan hynrei ban pynkynriah ïa ki sha ki jaka ba la mang kyrpang.
