Shillong, Lber, 05: U Symbud Myntri Rangbah ka Jylla uba khmih ïa ka tnat Kam Pohiing Bah Prestone Tynsong ha ka sngi Balang u la ong ba ka Sorkar Jylla ka la kut jingmut ban ïakhun pyrshah ban pynduh jait ïa u drok bad ban rat dyngkhong ruh ïa u drok na ka imlang ka sahlang.
“Ka jingktah jong u drok ïa kiba pyndonkam, ïa ki longiing longsem, ïa ki shnong ki thaw, ka la pynlong ïa ka tnat Pulit ban long kaba peitngor, ban ïatreilang bad ki kynhun syntiat, ban pynkhlaiñ shuh shuh ïa ki lad ki lynti ki ban pynlong ïa ka imlang ka sahlang kaba laitluid na u drok,” u la ong.
U Bah Tynsong u la ïathuh ruh ba ka Sorkar Meghalaya dang shen ka la shim ïa ka rai ban ïakhun pyrshah ïa u drok da kaba pynkha ïa ka shuki na ka bynta u Superintendent of Police ka Anti-Narcotic Task Force (ANTF) bad ka jingpynkha ïa ka ANTF Police Station ka ban khmih, ka ban buddien bad ka ban tohkit beit thik tang ïa ki case ba la register hapoh ki kyndon jong ka aiñ NDPS.
“Nalor kane, ka Sorkar ka la thaw ruh sa ïa ka Advisory Board ha ka 30 tarik, Jylliew, 2024 hapoh ka Prevention of Illicit Traffic in Narcotics Drugs and Psychotropic Substance Act 1988 (PITNDPS Act). Ka jingthmu jong kane ka Advisory Board ka long ban khmih ïa ki kam ba ïadei bad ki nongkhaïi drok kiba ju ïai pynkheiñ ïa ki kyndon jong ka aiñ na ka por sha ka por,” la ïathuh u Bah Tynsong haba jubab ïa ka Call Attention Motion ba la wanrah da u MLA ka VPP na Mawryngkneng u Bah Heaving Stone Kharpran.
U la pyntip ruh ba haduh mynta, lai ngut ki snar khaïi drok kiba dang ïai mlien ban khaïi ïa u drok ki la shah pynngat hapoh ki kyndon jong ka PITNDPS Act, 1988.
“Kum ka jingtrei shitom ban ïakhun pyrshah ïa ka jingkhaïi drok bad ban pynthikna ruh ban pynjulor ïa u drok ba la kurup bad kiwei kiwei ki jingdih pynbuaid ba la ïoh kurup ha ki 56 tylli ki jingjia bapher bapher ha ka 23 tarik Kyllalyngkot, 2025 la thang ha ka pajwa jong ka karkhana Star Cement, Lumshnong, East Jaiñtia Hills,” la ïathuh u Bah Tynsong bad pyntip ruh ba haduh 2.9977 kilo u drok heroin, 2,561.989 kilo u Ganja, 10.16 kilo u dawai kuli crystal meth balieh, 2.771 kilo ki dawai kuli Yaba bad kiwei kiwei ki jingdih pynbuaid la thang pynjulor lut.
