Shillong, Jylliew 01: U Additional Director General (ADG) jong ki shipai Border Security Force (BSF), Eastern Command, Kolkata, u Mahesh Kumar Aggarwal u la wan ban jngoh kumba 4 sngi ïa ka Meghalaya Frontier ban bishar kam haba ïadei bad ki jingpynkhreh ban ïada ïa u pud u sam bad ki sienjam ki kam ïada ha shi lynter jong u pud u sam jong ka India bad Bangladesh.
Ha kane ka jingwan jngoh, u ADG u la leit ban jurip ïa kiba bun ki Border Outposts (BOPs) kiba don ha West Jaiñtia Hills bad East Khasi Hills district. U la ïasyllok bad ki shipai BSF, u la ïaroh ïa ki jingaiti bad ki kam shakri wat hapdeng ka jinglong ka jaka bad ka jinglong ka suiñbneng.
U O P Upadhyay, IG BSF Frontier Meghalaya, u la batai lyngkot ïa u ADG halor ka jinglong jingman ha khappud, khamtam kaba ïadei bad ki kam ïaleh pyrshah ïa ki kam khaïi beaiñ, ki buit ban buh ïa ki shipai pahara bad ka jingïatreilang bad ki bor pynïaid jong ki shnong ki thaw bad bor pynïaid distrik.
U la khmih ruh ïa ki sienjam ba la shim ha ka ban ïada ïa ka jingwan rung tuh ba beaiñ na shilliang sha shilliang u pud u sam ki artylli ki ri bad ka jingpynphai biang ïa kiba la wan rung beaiñ sha u pud u sam ka India, bad pyntip ruh ïa ki jingjop ba ki shipai ki la ïakhun ban pynduh ïa ki kam beaiñ ha ki jaka khappud.
Kaba kren sha ki ophisar jong ki BSF Frontier Meghalaya, u ADG u la banjur halor ka jingdonkam ban pynneh ïa la ka burom, nangta ka jingpeitngor kaba khlem sangeh, bad ki jinglong ba tbit jong ki. U la pynpaw ruh ïa ki jingdonkam ban pynlong ïa ki prokram ban kyntiew ïa ki nongshong shnong khnang ban pynkhlaiñ ïa ka jingïadei bad ki shnong ha khappud.
Da kaba bynrap halor ki kam ban long kiba la pynkhreh, u ADG u la pynlong ki jingïalang bad ki ophisar pulit khnang ban pynkhlaiñ ka jingïatreilang bad ban pynthikna ïa ki lad ai jingïada jingshngaiñ ha kane ka thaiñ.
Na ka liang u Aggarwal u la leit ruh ban kynduh ïa u Lat ka jylla Meghalaya u Chandrashekhar H. Vijayashankar, ha Raj Bhavan, Shillong.
U la batai lyngkot ruh ïa u Lat ka jylla halor ki kam ïada bad jingshngaiñ ba la pynkhreh da ki shipai BSF ha shi lynter ka khappud ka India bad Bangladesh bad kumjuh ruh ki sienjam ba la shim da ki BSF ban ïada na ka bynta ka bha ka miat jong ka ri hi baroh kawei.
U ADG u la leit ruh ban ïakynduh ïa u Chief Secretary ka Meghalaya, u Bah DP Wahlang, ban ïakren halor ki kam ba ïadei bad ki jingpynïaid kam ha khappud, nangta ka jingïatreilang ki BSF ba ki nongshong shnong da kaba pynlong ïa ki prokram bapher bapher, ka jingïatreilang bad ki bor pulit bad ka jingkyrshan ba la ai da ki tnat bapher bapher jong ka jylla ban ïarap ïa ki shipai BSF ha ki kam khynra bapher bapher.
Na ka liang ki BSF la banjur biang ba kan ïai bteng ban nohsynniang na ka bynta ka jingshong shngaiñ ha khappud ka India bad kumjuh ruh ban trei na ka bynta ka bha ka miat ki shnong bad ki nongshong shnong kiba sah ha khappud.
