Shillong, K’lyngkot, 29: Ka Federation of Khasi Jaiñtia and Garo People (FKJGP) ka la kynthoh ba ka jingthmu jong ka Sorkar ban pynrung ïa ki kyndon kiba ïasyriem kum ka Inner Line Permit (ILP) ha ka Immigration and Foreigners Act, 2025 ka dei tang ka buit ban pynslem na ka bynta ban pyntreikam ïa ka Inner Line Permit (ILP) ha Meghalaya.
Ha ka jingïakren bad ka Batesi Tv ha ka sngi Palei u President ka FKJGP) Bah Dundee Cliff Khongsit u la ong, “ka jingwad ïa ki lad ki lynti ban pynrung ïa ki symboh jong ka ILP ha ka ka Immigration and Foreigners Act, 2025 nga sngew ba dei tang ka jingpynbiej paidbah bad ka buit ban pynslem.”
“
Ka jingïakhih jong ki sengbhalang ha ki snem 2014-2015 ban dawa ïa ka Inner Line Permit ka dei hi kaba ngi da pynshong nongrim namarba kum ka jylla bad kum ka jaidbynriew ngi la donkam palat ïa ka aiñ kaba ïada ïa ngi kum ka jaidbynriew,” u la ong.
“Ka jingbym pdiang jong ka Sorkar Congress ban pdiang ïa ka ILP hynrei ngim shym la kynran dien bad ka Sorkar ba ïalam da u Dr. Mukul Sangma ka la tyrwa da ka Meghalaya Residents Safety and Security Act, 2016 bad ha u snem 2020 la wanrah ïa ka jingpynbeit thymmai,” u la ong.
Haba kynthoh ïa ka jingwanrah ïa ka jingpynbeit thymmai ïa ka MRSSA,2016 ha u snem 2020 u la ong, “ngi sngewsih ban ong ba ka don ka jingkynthoh ba ka aiñ kam don ïa ki bniat (ba nep). Hynrei ka dei ka jingshemphang jong ki nongïalam sengbhalang bad ki bor sorkar ban shna ïa ka aiñ ka bym pynmong ïa kiwei pat ki jaidbynriew na kiwei ki jylla kiba wan rung sha ka jylla jong ngi.”
“Dei na kata ka daw ba kam don ka kyndon kaba la pynrung ïa ka kyntien Entry bad Exit Point namarba ka ktah ïa ka jingsngew jong kiwei pat ki nongshong shnong jong kiwei ki jylla hynrei la wanrah da ka kyntien kaba jem ‘Facilitation Centre’ katba ki kyndon kin dei kiba tehlakam ïa kiba wan nabar namarba kan kynthup ïa ka tnat Labour, ka tnat Infiltration bad ka tnat Tourism,” u la ong shuh shuh.
U la kynthoh ruh ïa ka jingshah wohnia halor ka jingwanrah ïa ka MRSSA ha u snem 2016.
“Haba ngi ïakren ïa ka jingrung kynthep, ngi tien ruh ïa ka jingwanrung kyrthep jong ki heh paidbah na kiwei ki jylla, ym tang ïa kiba wan na ka ri Bangladesh lane na ka ri Pakistan,” u la bynrap.
U la ong ruh ba ka jingjyllei ki mynder ri Muslim ha ka jylla ka long kaba donkam ban don ïa ka aiñ bapyrkhing.
“Ka long kaba sngewsih ban ïohi ba ka Sorkar haduh mynta kam pynpaw ïa ka jingkut jingmut ban ïakhun pyrshah ïa ka jingwan rung kyrthep ki briew kiba nabar. Lada ki mon, ngim ïohi ba kin don kita ki jingeh,” u la ong bad bynrap da kaba ai nuksa ruh ïa ka jingpyntreikam ïa ka ILP sha kiwei ki jylla.
