Shillong, Risaw, 27: Ki nongñiah trok kiba don hapoh ka shatri jong ka Meghalaya Commercial Truck Owners and Driver Association (MCTO&DA) ha ka sngi Saitjaiñ ki la byrngem ban ïaid biang na Sor Shillong hadien ba ki bor synshar jong ka East Khasi Hills District ki pynmih da ka hukum ba la khang ïa ki trok kit mar shaneng ban ïaid lyngba na ka surok Mawmaram-Mawlyndep.
Ka Deputy Commissioner jong ka East Khasi Hills District ha ka 21 tarik mynta u bnai ka la pynmih da ka hukum hapoh ka Section 163 BNSS ba la mana ïa ki trok kit mar ban ïaid lyngba ka surok Mawmaram-Nongthliew-Mawmih-Mawlyndep kaba hap hapoh u pud u sam jong ka East Khasi Hills District. Kino kino kiba pynkheiñ ïa kane ka hukum kin shah pynshitom hapoh ka Section 188 jong ka BNSS. Kane ka hukum ka la treikam noh mardor tad haduh ban da pynbna da kumwei pat.
Ka jingpynmih ïa kane ka hukum, ka long hadien ba la ïoh pdiang ïa ka jingpyntip ba ka jingïaid jong ki trok kiba kit ïa ki mar palat 9 ton lyngba ka surok Mawmaram-Nongthliew-Mawmih-Mawlyndep ka la pynsniew ïa ki katto katne ki bynta jong ka surok bad buh jingma ruh ïa ka leit ka wan jong ki nongshong shnong/ki nongleit nongwan namar ka jingkhim palat ka surok.
Ki dkhot ka MCTO&DA ki la rai ruh ban leit ïakynduh ïa ka Deputy Commissioner jong ka East Khasi Hills District ka Kong R.M Kurbah halor ka jingkhang ïa ki trok ban ïaid lyngba ka surok Mawmaram-Mawlyndep.
Ha ka jingïakren bad ki lad pathai khubor hadien ba la ai ka jingïalang kaba la long ha ka shnong Mairang Mission, Eastern West Khasi Hills District, u President jong ka MCTO&DA u Bah Mosklandar Marngar u la ïathuh ba ka jinglum ïa ka jingïalang ka long halor ka jingeh kaba ïadei bad ka surok na Mawmaram sha Lad Umsaw.
“Nyngkong eh ka mih ka khubor na u MP ka Shillong u Dr. Ricky AJ Syngkon kum u nongmihkhmat ha ka jingleit jurip ba ka jingsniew jong ka surok kaba pynjynjar ïa ka leit ka wan jong ki paidbah ka dei na ka jingïaid lynti jong ki trok High Level. Kane ka la pynsngewsih ïa ngi ki trai kali bad ïa ki nongñiah kali,” u la ong.
“Ha kano kano ka bynta kaba mih ka kyntien “High Level” ki dei beit ki trai bad ki nongñiah kali (kiba shah kynnoh) bad ka paw beit ba ka trok ka dei ka High level . Kane ka pynsngewsih ïa ki dkhot jong ngi,” ong u Bah Marngar.
“Kaba pynsngewsih ïa ngi ka long ba ki trok kiba ïaid na Mawmaram la shah khot da ki trok High Level. Ki (dkhot jong ngi) thied trok da ka umsyep lajong bad ki kit ïa ki mar ki mata ban kamai jakpoh ym ban kit ïa kita ki mar jong ki High Level. Ki High Level kim buh trok hi ruh. Ka kyntien High Level ka mih na ki hamsaïa. Ngi ruh ngim lap ïa kata.”
“Kiba pyndonkam ïa ka surok na Mawmaram ka dei ka lad ka lynti kaba khatduh bad ka jingkyrmen kaba rit ïa ki trai trok bad ki nongñiah trok. Kiba basah ha ka thaiñ Pynursla, Sohra, Mawsynram, South West Khasi Hills, West Khasi Hills, Eastern West Khasi Hills kiba ju kit mar sha Byrnihat bad Guwahati ka surok mawmaram ka dei u budlum naduh ba la khang ka jingkieng Damsite,” la ïathuh u Bah Marngar.
Haba pynpaw ïa ka jingkiewdor jong ki marbam mardih, u Bah marngar u la ong, “50 persen ngi don ka jingnoh synniang ha ka jinghiar dor bad ka jingkiewdor jong ki mar ki mata. Lada ka suk ka lynti ïaid bad ka duna ka bai kali ngi lah ban shim duna ïa ka bai kali bad lada shim duna ma ngi, ki nongdie ki lah ban die duna bad lada ngi shim bun ki nongdie ruh ki hap ban shim bun. Ka jingbym lait lynti shuh ban ïaid na jingkieng Damsite ka dei ka daw ka jingkiew dor.”
“Ki jingpynsngew ba ngi ïoh lum, mynshwa lada ïaid na ka jingkieng Damsite sha Umshyrpi ka shim por tang shi kynta bad ka umphniang Diesel ka bam tang T. 3 hajar. Ka jingphah ïaid ka Sorkar na Mawryngkneng ka la bam bun shah ïa ka por bad mynta ngi ïaid 3 kynta. Na Lad Umsaw haduh Mawmaram ka umphniang ka la kiew T. 7 hajar eiei bad lynti ïaid ka shim por 3 kynta na ka jingjngai ka surok,” ïathuh u Bah Marngar.
“Lada ngim ïaid na Mawmaram ka dor kit kaba ai ïa ngi kam ïahap shuh bad ngi hap ban ïakhih ban pan da ka dor kaba rem. Ngi ïaleh katba lah ban kiar na kaba ïaid na Mawrynkneng ba ka shimpor jin ar sngi shi miet namarba ynda la poi sa ha Laitkor la shah bat No Entry. Lada wan rung sha Shillong ki trok ki hap ban ïaid ha ka por mynmiet ba la kynjah ka Sor,” u la bynrap.
“Hadien ka jingkren jong u MP ka Shillong ïa ka surok (Mawmaram-Mawlyndep) ki la don sa ki riewshim kabu kiba buh ïa ki khyrdop lum khajna ha surok bad ki byrngem byrsit ïa ki dkhot ka MCTO&DA bad ïa ngi ki nongïalam ka seng da kaba ong ba ka surok kam long shuh ban ïaid bad u MP ruh u la kren mynta lada phi pyneh ïa ngi, ngin hap leit sha ki bor jong ka Sorkar,” u la ong bad bynrap, “ngim siew ïa ka bai khrong khajna ha surok. Ngi ïohi ba la pynmih hukum sa ka Deputy Commissioner bym shah shuh ïa ki trok ban ïaid na Mawmaram sha Mawlyndep. Tang shu mih kane ka khubor, kijuh ki briew ki bat bor ïa ka surok. Imat kine hi ki dei ki High Level ba lada phim siew ïa ka pisa ngin ai hukum ïa ka Sorkar ban khang noh ïa ka surok. Kumba ki kren ka jia sbak kumta.”
“Don ki dkhot kiba la ai jingmut ban ïaid beit na Sor Shillong bad lada jia eiei ïa ki paidbah ka sor Shillong ki bor Sorkar hi kin ban hap ban shim ïa ka jingkitkhlieh,” ong shuh shuh u Bah Marngar.
