Shillong, Risaw, 18: “Ngim kwah ba ka jylla kan ïoh nam ha ka kyrdan banyngkong ha ka kam pynïap briew,” ong u Bah Adelbert Nongrum haba kren ha ka jingïalang thang mombati sngewlem ba la pynlong da ka Seng Samla Jaïaw Pyllun ha ka Sngi Saitjaiñ halor ka jingshah pynïap ba dang shen jong i heprit Insaphira Lyngdoh Mawnai iba la 4 snem ka rta bad u heprit Kyrshanbor Kharmudai, uba la 7 snem ka rta kiba shong basah ha ka shnong Nongrah.
“Ka Sorkar bad ka tnat Pulit ki dei ban pynkhlaiñ ïa ka tnat syntiat khnang ban ïohkem ïa ki runar kiba donkti halor kine ki jingjia kiba pynsuhjer bad kiba la pynshongsyier ïa ka imlang ka sahlang baroh kawei,” u la ong.
U la ong ruh ba ki briew kiba donkti ban leh ïa ka kam bymman ki dei ki khappud kiba la dep ïap lypa bunsien. “Ka jinglong khawpud jong ki, ka la pynlong ïa ki ban ïap bunsien shwa ba kin mad ïa ka jingïap ba shisha,” u la bynrap.
“Kine ki jingjia kiba pyntieng bad kiba pynsyier mynsiem ïa ka imlang ka sahlang, ïa ka shnong ka thaw, ïa ka iing ka sem, dei ba ki don kine ki briew (riewthrang snam) kiba pynlong ïa ka daw ban pynsyier bad ban pynsynjor ïa ka jingïalong kawei kum ka jaidbynriew,” la kynthoh u Bah Nongrum.
“Kum ka jaidbynriew ngi hap ban pynkhlaiñ ïa ki jingduwai namarba ngi sngew kut lad,ngi sngew duh jingkyrmen shaei ngin phai namarba tang ka tnat Pulit kan ym lah, tang ka Sorkar kan ym lah, tang ki sengbhalang kin ym lah, ka shnong ka thaw kan ym lah bad ma ngi iwei pa iwei ngi hap ban shim ïa ka jingkitkhlieh, ngi hap ban pynkup ïa ka jingkitkhlieh ha ngi iwei pa iwei,” u la ong.
U la pan ruh ïa ka jingïatreilang bad ka jingai jingmut na ki Dorbar Shnong kiba hap hapoh ka North Shillong Constituency.
“Ngi donkam ban pynkhlaiñ ban buh ïa ki CCTV ban khanglad, ban pynduna, ban pynduhjait ïa ki jingsniew,” la bynrap u Bah Nongrum.
“Kum ka Dorbar Shnong bad ma nga kum u MLA ngi hap ban trei na ka bynta ban ïada bad ban wanrah ïa ka jingshngaiñ ha ka ri jong ngi,” la bynrap shuh shuh u Bah Nongrum.
“Nga kyrpad ïa ki Dorbar Shnong ba kin leh ïa la ka jong ka kamram ban peit ïa ki jaka ba i donkam kyrkieh ban pyndait ïa ki CCTV khnang ban lait na ki riewshim kabu kiba shlan ban pynjulor ha ka por mynmiet,” u la ong.
“Ngim lah ban hun tang ban shu pynrem halor kane ka jingjia. Kam dei ban shu kut noh tang ha jingpynrem hynrei ngi ngeit skhem ba kita ki mynsiem ksiar, ki mynsiem rupa, ki khyllung kiba dang riewblei kiba la mad ïa kine ki jingjia ki don ka bynta kaba khraw ban ïasaid,” la ong shuh shuh u Bah Nongrum.
“Ka tnat Pulit bad ma ngi ki nongshong shnong ngi dei ban long kum ki nongpeitngor ban thwet khnang ban pynkut ïa kine ki kam sniew ha kane ka ri jong ngi,” u la ong bad bynrap, “ka tnat Pulit ka dei ban pyndep ïa la ka jong ka kamram khnang ban ngin dup ïoh ïa ka jingshaniah bad ba ngin dup lah ban ïatreilang ryngkat ryngkat ha kiba bun ki liang.”
