Shillong, Nailar 09: Ki nongialam jong ka Lympung ki Seng Kynthei (LSK) ha ka sngi Balang ki la iakynduh ia u Chief Executive Member (CEM) jong ka Khasi Hills Autonomous District Council (KHADC) u Bah Pyniaid Sing Syiem ban pynsngew ha u ia ka jingkwah jong ka kynhun ba ka por ka la ih bad katkum ka jingtyllun jong ka shalyntem ki por, ki kynthei ruh ki dei ban iadon bynta lang tang kum ki dkhot jong ka Executive Committee ha ki Dorbar Shnong.
Ha ka jingiakren bad ki lad pathai khubor ka President jong ka Lympung ki Seng Kynthei ka Kong Theilin Phanbuh, ka la ong, “ngi la pynsngew ha u CEM ban leh eiei katba shah ka aiñ namar ba kane lehse ka long kaba dang thymmai bad lehse ki don ruh ki Dorbar Shnong kiba la kynthup ia ki kynthei ha ki Executive Committee jong ka Dorbar Shnong hynrei kiba bun hi mynta ki dang duna.”
Kane ka jingpynsngew jong ka Lympung ki Seng Kynthei ka long ba ka District Council kan pynmih da ka jingbthah sha ki Dorbar Shnong ki bym pat don ia ki kynthei kum ki Executive Member ba kin pynrung ia ki hapoh ka EC jong ka Dobar Shnong.
“Ngi sngewdonkam ba kan long ryntih namar ba ki kynthei ki kham sngewthuh ia kino kino ki jingeh, da kaba iadon lang, ia pyrkhat lang bad iarai lang ban wanrah ia ka jingmyntoi, ka jingbit jingbiang bad ka jingbha hapoh ka shnong ka thaw,” la ong ka Kong Phanbuh.
Haba kylli, ka President jong ka Lympung ki Seng Kynthei ka la ong, “hooid ka dei ka dustur naduh hyndai hynthai ba ki Kynthei kim lah ban iadon bynta ha ka Dorbar hynrei phi hap ban peit pat katkum ka jingiaid jong ka por ba la idonkam ban iadon bynta lang bad ban iatreilang namar ba ki kam haba iatreilang hapdeng ki shynrang bad ki kynthei ka wanrah ia ka jingbha.”
Ia mynta, ka Lympung Ki Seng Kynthei, ka don 31 tylli ki Unit jong ki Seng Kynthei na ki shnong bapher bapher. Hynrei ki don pat ki shnong ba ki dkhot ki Seng Kynthei kim pat ioh rung kum ki dkhot jong ki Executive Member jong ki Dorbar Shnong hynrei lait noh tang ha ki katto katne ki Dorbar Shnong.
Ka Adviser jong ka LSK ka Kong P.Lyngdoh, haba bynrap halor kane ka la ong, “ngi la iohi bun, da ka jingiatreilang jong ki kynthei hapoh ki Dorbar Shnong ka la wanrah jingmyntoi shikatdei eh.”
“Ka jingkwah jong ngi ka long tang ban kren ia ka bha ka miat jong ki kynthei bad ia ka imlang ka sahlang bad ngim shym iakren ba ngi kwah ban long Rangbah Shnong namarba ngi ki kynthei ngi sngewthuh ia ka bor lajong, ka dor lajong. Ngi kwah tang ban don ha ki Executive Committee jong ki Dorbar Shnong ba ngin iarai lang, ban iohi lang bad ban kdew lang khamtam ha kito ki shnong ki bym don ia ki Kynthei ha ki Executive Committee jong ki Dorbar Shnong,” la bynrap ka Kong Lyngdoh.
