Shillong, ïaïong, 12: Ka National Peoples Party Womens Front Meghalaya State Unit ha ka sngi Thohdieng ka la pynrem jur ïa ki runar kiba donkti ban kawang maw ïa ka ingsah jong ka MDC ka NPP na Umsning Constituency ka Kong Macdalyne Sawkmie Mawlong ha ka janmiet 10 tarik mynta u bnai ha ka shnong Mawlein Mawkhan, Sohkyndur, Ribhoi District.
Ki Pulit kiba la ïoh kurup ar tylli ki maw napoh ka ing sah jong ka Kong Magdalyne bad lap ruh ba ki jingkhang iing ki la pait.
Ka President jong ka NPP Womens Front Meghalaya State Unit Dr. Jasmine M. Lyngdoh ka la ong, “kum ki longkmie ki dap da ka jingsngewkhia haba ïohsngew ïa ka jingjia kaba pynsyier ïa ngi ban ïatrei na ka bynta ki kam elekshon ha kaba ki don ki briew kiba la kawang da ki maw ïa ka ingsah jong ka Working President ka Kong Magdalyne Sawkmie Mawlong shwa ba kan leit sha ka jingïalang. Hynrei da ka jingïada jong u Blei donbok ba im shym la mynsaw.”
“Ngi pynrem jur ïa kane ka jingjia. Ngi kwah ban ïathuh ïa ki nongshong shnong ha kane ka jylla ba ngim lah ban ïaleh da kaba shu pynmynsaw ïa kiwei ne ngim lah ban ban ïaleh ïa ka elekshon da kaba pyntieng ne da kaba pynsyier ïa kiwei. Kane ka dei ka ri synshar paidbah, ngi don ïa ka hok ban jied ïa ki briew lajong, ngi don ka hok ba ngin trei ha ka por elekshon bad ngi don ruh ïa ka hok ba ngin sngewshngaiñ ha la ki jong ki shnong ki thaw lajong,” la ong ka Dr. Jasmine.
“Ka NPP Womens Front ka pynrem jur ïa kane ka jingjia bad ngim kwah shuh ba kine ki jingjia kin wan jia ha ka por ba ngi dang pynkhreh na ka bynta i kyrtong jong ngi i Dr. Ampareen. Ngi sngew sarong ba i dei ka longkmie ban ïakhun ïa ka elkeshon bad ngi sngew sarong ba i long iba shlur ban shim ïa kane ka lyngkor ban leit sha ki shnong ki thaw ban pan ïa ka jingkyrshan na ki nongshong shnong,” ka la ong.
“Ngi kwah ba ki briew kin sngewthuh ba ki dei ban long kiba jaijai bad ba kin ailad ruh ïa kiwei ba kin don ïa kata ka hok ba kin leit thep ïa ka vote bad ba kin jied ïa ki nongïalam katkum ka jingkwah jong ki,” la kyntu ïa kane ka nongïalam jong ka NPP Womens Front.
Ka Kong Macdalyne haba ïathuh ïa ka jingjia ha ka janmiet 10 tarik ka la ong, “katba nga dang kren phone ha phyllaw ing ha Umsning hapdeng katto katne minit ba nga ieng ka la don kata ka jingher ki maw najan ka khlieh jong nga bad mar kumta nga kyndit khamtam ïa nga ka longkmie wat ha phyllaw ing (lajong) ruh kam don shuh ka jingshngaiñ. Nga la mareh bad ki dang don ki nongïalam hapoh ïing nga dap da ka jingher syrngiew, ka jingtieng kaba khraw ba kum kane ka por wat ha ka ingsah lajong ruh kam don shuh ka jingshngaiñ.”
“Nga sngewnguh ïa u Blei dei ma U, Uba ïada bad lymda dei ba ma U ba ïada nga la mynsaw na ka bynta jong ka khlieh. Kine ki briew ki dei kiba la suhbuit lypa. Nga da sngewkhia shisha lada mynta ka jia ïa nga lashai hadien habud kan jia ïano re ïano. Ngi dei ki longkmie, ki kmie, ki hymmen, ngi don ki hymmen ki para bad nga kyntu jur ïa ki longkmie ban ïamih ha kane ka jylli jong ka saiñpyrthei ban mih shakhmat bad khamtam na ka party jong ngi, ngi don i Dr. Ampareen kum ka longkmie ngi sngewkmen bad ngi sngewshngaiñ ba ki longkmie ki don ban saiñdur lang ïa ka imlang ka sahlang,” ka la ong.
“Ha kane ka por ba ngi leit na ka liang jong ka party ngi leit da ka mon sngewbha, ngi leit da ka jingieid bad da ka jingsngewthuh jingmut bad ngim dei ba ngi leit ban pynïashun bad pynïashrut ïano ïano bad ngim tip ïa kita ki riewbymman kiba shim kabu ha kano ka dur bad halor kano ka rukom ïa ka kynthei ki wan da ki tiar pynmynsaw ban pynjulor ïa ka ing,” la ong shuh shuh ka Kong Macdalyne.
“Ngi shu sheptieng kum ki longkmie haba ngi leit ngi wan kaei ka ban jia hadien ngi ngim tip. Nga kum ka longkmie nga iengskhem ba ngin don ha ka jylli jong ka saiñpyrthei ngi ieid ban shakri. Haba ngi shakri ïa ki parabriew, ngi shakri ruh ïa U Blei, Ngi shim kynta ïa kane ka kam, (namarba ka dei ka) kam kaba bha,” ka la ong.
Haba kylli, ka la ong,” na ka liang jong nga, ngam kynnoh hi ruh ïano ïano. Katba ka dang ïaid ka jingtohkit jong ki Pulit ngam pat lah ban ong ïano bad mano ngi ieh ïa ka jingstad ka tnat Pulit.”
Ka President barim jong ka NPP Womens Front Kong P. Nongpluh haba bynrap halor kane, ka la ong, “kum ki nongtrei party ngi sngewkmen ba i Kong Ampareen i la lah ban kit ïa ka lyngkor. Ka jingkit jong i ïa kane ka lyngkor ngi ïohi pat ba ka jingkynthoh pyrshah ïa i ka long kaba isaitmet. Kum ki longkmie ngim lah ban pddaing ban shu kren katba mon ma ki. Ym shym la pynbor ïa ngi bad ngi don la ka jong ka nongrim lajong ban ieng ha ka party bad ngi kyrpad ïa kito kiba ju mlien ban pyndik ha ki jingïalang jong kiwei sngewbha wat wan pyndik ïa kiwei. Ngi kyrpad ïa ki nongbud kiba ieid ïa ngi ba kim dei ban khluit kumba khluit kiwei namarba lada ka party jong ngi ruh ka khluit kan poi sha kaba mynsaw namar ban shu leit pynwit ha manla ki jaka ba long jingïalang kiwei bad ban shu leit hylla ma phi ngim lah ban pdiang namarba ka jingleh jong ki ka long kaba isaitmet bad ba ngim lah ban pdiang.”
