Shillong, Nailur 28: Ka sur jong ki paidbah na ki 15 tylli ki la rai ban ym pdiang ïa ka jingpynsngew paidbah (public hearing) kaba ladep pynlong da ka ophis jong u Chief Executive Officer (CEO) ka Shillong Municipal Board (SMB) ha ka 23 tarik mynta u bnai ha ka shnong Nonghali na ka bynta ban shna ïa ka jaka thehniut ba thymmai jong ka New Shillong Township.
Ki la pynpaw ba ka jingpynsngew paidbah kaba la long ha ka shnong Nonghali ka dei kaba la shu leh donbor da ki bor Sorkar khlem da shim lem ïa ki jingai jingmut na ki paidbah jong ki 15 tylli ki shnong.
Ki paidbah ki la shim ïa kane ka rai ha ka jingïalang paidbah kaba la long ha ka sngi Saitjaiñ ha ka shnong Thadrang, ïa kaba la pynlong da ka Synjuk ki Nongsynshar Shnong Par Umkhen (SNSPU).
U President jong ka Synjuk u Bah Super Rngaid ha ka jingïakren bad u nonglum khubor hadien ba la wai ka jingïalang u la ong, “ngi ïa ka jingsngewsih ba ngim shym la ïohlad kum ki paidbah kiba don ha ka synjuk ban ïashim bynta lang ha ka jingpynsngew paidbah ba la pynlong da ka Sorkar ha ka shnong Nonghali. Ki 15 tylli ki shnong ki pynpaw ïa ka jingbymsngew hun.”
Haba pyntip ïa ka jingshim rai ha ka jingïalang paidbah, u Bah Rngaid u la ong, “kaba nyngkong ka long ban pynrem ïa ka Sorkar halor ka jingpynïaid beaiñ ïa ka jingpynsngew paidbah ha Nonghali. Ki paidbah ki kwah ban ïohsngew da lade ïa ki jingpynshai na ka tnat Urban hynrei kaba sngewsih ka long ba ki la shah khang lynti bad ym shym la ailad ban rung sha jingïalang.”
“Kaba ar, lada ka Sorkar ka ong ba ka jingpynsngew paidbah ba la pynlong ha Nonghali kan pyntreikam shakhmat na ka liang jong ka Synjuk ka la rai ban ym ailad long katba long, jia katba jia, ngin ym ailad ba ka jingpynsngew paidbah kaba la long ha Nonghali kan treikam. Ngi dawa ba dei ban pynsangeh noh mardor bad ka jingpynsngew paidbah kaba la long ha Nonghali kam dei ban treikam,” u la ong.
“Ngi la rai ban kyntu ïa ki nongmihkhmat naduh u Symbud Myntri Rangbah uba peit ïa ka tnat Pynroi Sor Bah Sniawbhalang Dhar ba un shim ïa ka jingkitkhlieh ban pynkynriah ïa ka jaka theniut sha kiwei pat ki jaka kiba jngai na ka tyllong um bad khamtam na ka wah Umkhen,” la bynrap u Bah Rngaid.
“Ngi la rai, lada ka Sorkar kam pynsangeh noh mardor, kan poi ka por ba ngi ki paidbah ka synjuk, ngin leit shong shah thngan hakhmat iing jong ki haduh ba kin da ïohsngew ïa ki jingud jingnam jong ngi ki paidbah,” la pyntip u Bah Rngaid bad bynrap, “lada ka Sorkar ka leh mutlop bad kam pynsngap ïa ki jingdawa jong ngi, ki paidbah ki la rai mynta ka sngi ban leit tied ïa ka jingkhang jong ka Iingbishar Meghalaya High Court ba kan bishar ïa kane ka kam.”
