Shillong, ïaïong, 09: Ka Awaken India Movement (AIM) ha ka sngi Balang ka la aipor 7 sngi ïa ka Sorkar Jylla ba kan sangeh noh mardor ban pynbor ïa ki paidbah ba kin pynrung kyrteng Aadhaar.
Ïa kane ka rai la shim hadien ka jingïakhih kaba la long hakhmat u durmot jong u Kiang Nangbah ha Barik Point hapdeng ka jingpahara da ki bor Pulit.
Ka la mih ruh ka jingïapynibor haba ki Pulit ki la khanglad ïa ki nongïakhih ban ïaid paidbah sha Secretariat da ka jingthmu ban leit ai dorkhas u Myntri Rangbah ka Jylla u Conrad K. Sangma.
Kane ka jingjia ka la wanrah ïa ka jingdheng kali ha Barik Point kat haduh ba ki kali ki la sahkut sbak hajuh hadien ba la mih ka jingïapynibor bad ka thma ktien hapdeng ki Pulit bad ki nongïakhih.
La sakhi ruh ba ki Pulit ki la patrong da ka bor ban thep hapoh kali ïa ki nongïalam jong ka AIM hynrei la pyllait noh da ka jingtuklar jong u MLA ka North Shillong Constituency u Bah Adelbert Nongrum, uba la ïasnohkti lang bad ka AIM ban pyrshah ïa ka jingpynrung kyrteng Aadhaar.
Hadien kane, ïa ki nongïalam jong ka AIM la ailad ba kin ïakynduh ïa ka Deputy Commissioner jong ka East Khasi Hills District ka Kong R.M Kurbah bad aiti ïa ka dorkhas halor kane ka jingpyrshah ban pynrung kyrteng Aadhaar.
U President jong ka AIM Bah Banshai Marbaniang haba kren sha ki lad pathai khubor u la ïathuh ba ka Deputy Commissioner ka la kular ba kan sa phah ïa ka dorkhas sha u Myntri Rangbah ka Jylla u Conrad K Sangma ban shim rai halor ka jingdawa jong ka AIM.
U la pynshai ruh ba ka AIM kam pyrshah satia ka jingpynrung kyrteng Aadhaar hynrei ka pyrshah ïa ka jingpyrshang jong ka Sorkar ban pynbor ïa ki paidbah ha ka jylla ba kin pynrung kyrteng Aadhaar.
Haba kdew katkum ka rai jong ka Iingbishar Supreme Court u Bah Marbaniang u la ong, “ka (rai jong ka ïingbishar) ka la kdew shai ba ha ki jylla kum ka Meghalaya, Assam bad Jammu & Kashmir, u Aadhaar kam da donkam than. Namarkata, ai ba ki paidbah kin rai hi da lade lada ki kwah ban pynrung kyrteng Aadhaar lane kim kwah. Ban shu pynbor ka long kaei kaei ka bym lah satia ban pdiang ha ka ri synshar paidbah.”
Une u nongïalam ka AIM u la kynnoh ba ka Sorkar ka la byrngem ban pynsangeh ïa ki jingïoh jingmyntoi jong ki paidbah naduh ki samla pule, ki ASHA, Anganwadi worker, ki nongtrei job card MGNREGS, ki nongïoh penshon lada kim don ïa u Aadhaar.
