Shillong, K’lyngkot, 05: U nongïalam jong ka Khun Hynñiewtrep National Awakening Movement (KHNAM) u Bah Thomas Passah u la ong ba ka party hi daleilei ruh em kan ym lah ban satia ban ïatreilang bad ka NPP lane bad ka BJP namarba kum ka party ka ladep ïohi ïa ki kam ba kine ki ar tylli ki seng saiñpyrthei ki la leh ha kine ki snem ba la leit noh.
“Ngi don ïa ka Manifesto jong ngi kaba shai bha bad lada kwah ban ïatreilang bad ka KHNAM dei ban pyntreikam nyngkong eh ha ka wat kaba nyngkong, kata, 50 na ka 100 dei ban pyntreikam ïa ki mat treikam jong ka party. Kino kino (ki seng saiñpyrthei) kiba kwah ban ïatreilang ki hap beit ban pyndep. Ban ïoh ïa ka jingshaniah, 50 na ka 100 dei ban pyntreikam ïa ki mat treikam ba ngi la buh bad ba dei ban pynurlong,” ong u President ka KHNAM.
“Ïa ka jingshisha pat ngi hap ban sngewthuh, bad ka NPP ngin ym lah ban ïatreilang, bad ka BJP ruh ngin ym lah ban ïatreilang. Hynrei bad kiwei pat ki party kiba don ïa kajuh ka jingïasngewthuh jingmut ngi lah ban ïatreilang hynrei lait noh na kine ki ar tylli ki seng saiñpyrthei ba ngi la jer kyrteng namarba ngi la ïohi ïa ki kam ki jong ki,” la pynpaw u Bah Passah.
“Ngim kwah ban shu pynlut kai ïa ka por lajong bad lada kiwei kiwei pat ki seng saiñpyrthei ki kwah ban ïatreilang ki hap ban pyntreikam pura lut baroh ïa ki mat jong ka party. Kiwei ruh ki lah ban wanrah lang ïa ki mat jong ki ha ka thup ïatreilang hynrei ki jong ngi ruh ki dei ban don 100 persen ha ka Common Minimum Programme kaba ngin pyndep ha ki san snem ka ban sa wan,” la bynrap shuh shuh u Bah Passah.
