Shillong, Naitung, 02: U Symbud Myntri Rangbah ka Jylla uba khmih ïa ka tnat Kam Pohing u Bah Prestone Tynsong u la ong ba ka jingshim rai jong ka Sorkar ban pynkynriah ïa ki nongdie madan ha Khyndailad ka long ban pynmyntoi hi ïa ki, ym ban leh beiñ ïa ki.
Katkum ka jingong jong u Bah Tynsong, ka jingpynkynriah ka long na ka bynta ka bha ka miat jong ki nongdie madan bad ka Sorkar ka la ai jingïarap ruh ïa ki ban kynriah sha ki jaka ba la buh.
Ha ka jingïakren bad ki lad pathai khubor u Bah Tynsong u la pyntip ruh ba ki nongdie madan kin ïoh pdiang ïa ka song pisa kum ka Shifting Allowance kaba T. 10,000 bad sa T.2 hajar shi bnai na ka bynta san bnai ynda ki la kynriah sha ka jaka ba la mang.
U la pynpaw pat ïa ka jinglyngngoh ba ki don katto katne ngut ki nongdie madan kiba pynmih jingeh watla ka Sorkar ka la trei shitom ban ai jingkyrshan ïa ki.
“Kam dei satia ba ngi kwah ban lehbein ïa ki nongdie madan. Ha ka jingshisha ka leh ïa kane na ka bynta ka jingbha jong ki hi. Phin ym ïohi sorkar hangno hangno ruh kaba pyrkhat lem ïa ka jingbha jong ki nongdie madan. Ngin ai ïa ka Shifting Allowance kaba T. 10,000 hajar bad nalor kata, ynda ki la kynriah sha ki jaka ba la mang, sa shisien pat yn siew na ka bynta san bnai T.2 hajar sha ki nongdie madan ba ladep ithuh,” pyntip u Bah Tynsong.
Shuh shuh u Symbud Myntri Rangbah u la pynshai ba ka Town Vending Committee, kaba kynthup ïa ki nongmihkhmat na ki nongdie madan, ka la trei shitom halor ka jingthmu jong ka sorkar bad ka la shong jingïalang la bun bun sien ban shim ïa ka rai ba khatduh.
U la kyrpad ïa ki nongdie madan ban ïatreilang bad ka Committee bad ban wanrah ïa ki jingeh jong ki ha ka miej jingïakren khnang ba yn dup lah ban weng ïa ki jingeh.
Ha kaba ïadei bad ka jingïakhih ba dang shen jong ki nongdie madan, u Bah Tynsong u la kyntu ïa ki ban ïatreilang bad ka Committee, bad u la kular ruh ba un sa shimkhia ïa ki jingpynsngew jong ki.
“Namarkata, nga kyrpad ïa baroh ki nongdie madan ba kin ïatreilang, wanrah ïa baroh ki jingeh jong phi ha kane ka komiti bad ka komiti kan shimkhia ïa baroh ki jingeh bad na ka liang ka Sorkar, ngim kwah ban shu bret noh ïa ki,” ong u Bah Tynsong bad bynrap da kaba pynksan ba ka Sorkar ka sngewthuh ïa ka kamai kajih jong ki nongdie madan bad ka la shimkhia ban kyrshan ïa ki da kaba bud pyrkhing ïa ka Street Vendors (Protection of Livelihood and Regulation of Street Vending) Act bad ka Rules ba la pyntreikam da ka Sorkar Jylla.
